Alaksandr Łukašenka 12 maja daručyŭ pierahledzieć hrafik raboty ahulnaadukacyjnych škoł. Na jaho dumku, zaniatki pavinny pačynacca a 9-j ranicy.
«Naša Niva» pacikaviłasia ŭ piedahohaŭ, što jašče treba mianiać u biełaruskich škołach.
Jaŭhieni Liviant, były nastaŭnik matematyki i fiziki, prafiesijny repietytar.
«Hrafik pracy škoł — heta, na moj pohlad, nie hałoŭnaja prablema našaj sistemy adukacyi. U nas sistemny kryzis u adukacyi. I jość prablemy bolš istotnyja, jakija daŭno treba vyrašać.
Jaŭhieni Liviant. Fota - Alaksandr Vasiukovič, «Imiena»
Naprykład, treba padymać sacyjalny status nastaŭnikaŭ. Plus pazbavicca ad žudasnaj biurakratyzacyi nastaŭnickaj pracy. Adukacyja — žudasna pierahružanaja papierami halina, šalony dakumientaabarot nie idzie na karyść, a amal paralizuje pracu škoł.
Taksama treba mianiać navučalnyja prahramy i, adpaviedna, padručniki. Prahramy, pa jakich vučacca dzieci, nie adpaviadajuć sučasnamu žyćciu, jany pierahružanyja druhasnaj infarmacyjaj, jany niełahičnyja, nie adaptavanyja da ŭzrostu vučniaŭ, prahramy pa roznych pradmietach nie źviazanyja pamiž saboju… Jany krytyčna kiepskija.
Da taho ž, našy vučebnyja prahramy nijak nie karelujuć z prahramami našych susiedziaŭ: Polščy, Rasii. Nadta asabisty šlach u adukacyi ŭ nas atrymlivajecca čamuści!
Što ž tyčycca mienavita hrafika — to hetaje pytańnie ŭ pieršuju čarhu pavinna abmiarkoŭvacca z hramadstvam, a nie rabicca pa zahadzie źvierchu. Bo što rabić, naprykład, baćkam, jakim treba jechać na pracu a vośmaj ranicy? Što im rabić ź dziećmi?»
Uładzimir Kołas, dyrektar Kołasaŭskaha liceja
«Adukacyi patrebnyja reformy, jakija buduć padrychtavanyja kampietentnymi ludźmi, jakija buduć abmiarkoŭvacca hramadstvam, a nie prosta źmiena hrafiku na hadzinu.
Uładzimir Kołas. Fota — Radyjo Racyja
Naprykład, abaviazkova pavinna być dyfierencyjacyja adukacyi: kab vučań u hady pierad vypuskam moh abirać patrebny nakirunak, dyscypliny, jakija jamu patrebnyja i jakija jon budzie pahłyblena vyvučać. Moŭnaje pytańnie, iznoŭ ža. Nabližeńnie našaj adukacyi da jeŭrapiejskaj… I vynik adukacyi — kaho vy chočacie bačyć pa vychadzie z navučalnaj ustanovy? Čałavieka sa ściortaj identyčnaściu Sajuznaj dziaržavy ci žychara jeŭrapiejskaj krainy pad nazvaj Biełaruś?
A tut iduć inšym šlacham. U ideale było b dobra, kab hrafik naviedvańnia škoły ŭvohule byŭ indyvidualnym dla kožnaha. Ale toje ŭtopija, da jakoj, moža, i nie varta imknucca. A tak my bačym, jak adzin čałaviek pad svajho syna buduje ŭsiu sistemu adukacyi. Heta nie zusim pravilna. Moža vyrašyć usio praściej, prosta pieravieści adnaho viadomaha vučnia na indyvidualnaje chatniaje navučańnie, i na zdaroŭje? Navošta mučyć usiu krainu?
Naprykład, u našym licei zaniatki pačynajucca a 9-j hadzinie, bo da nas jeduć z usiaho horada. Kali łaska, možam pryniać, kali projdzie pa konkursie. Ale, dumaju, projdzie, chłopiec zdolny».
