Kamientar pa fatahrafijach ździekaŭ z 15-hadovaha baranavickaha školnika, jaki skončyŭ žyćcio samahubstvam, dali va Upraŭleńni Śledčaha kamiteta pa Bresckaj vobłaści.
Pa viersii śledstva, chłopiec na fota z zamatanym futbołkaj tvaram - blizki siabar zahinułaha Ułada. Adnak znajomyja chłopca śćviardžajuć, što było jašče i videa, źviazanaje z hetymi fatahrafijami. I na videa, pa ich słovach, Ułada źbivali nie žartam.
Jak paviedamili Intex-press va USK pa Bresckaj vobłaści, chłopcy, jakija fihurujuć na fota, «byli blizkimi siabrami» zahinułaha padletka, žyli ź im u adnym rajonie. Adnakłaśnikaŭ siarod ich nie było.
«U toj momant, ź ich słovaŭ, jany vyrašyli «pažartavać» sa znajomych dziaŭčat, jakija prachodzili pobač. Dla hetaha 15-hadovy školnik zymitavaŭ, što nibyta jon pryviazany da dreva, a na samaj spravie tolki chavaŭ svaje ruki za stvałom. Inšy chłopiec ihraŭ rolu «ahresara», abmataŭšy hałavu zialonaj majkaj, i rabiŭ vyhlad, što nanosić ŭdary. Kali dziaŭčaty heta ŭbačyli, to pačali kryčać i patrabavać, kab chłopcy spynili svaje dziejańni. Paśla taho, jak «źbity» padniaŭsia i pačaŭ śmiajacca, jany, zhodna ź ich śviedčańniami, zrazumieli, što tyja prykidvalisia. Usio, što adbyvałasia, kampanija zachavała z dapamohaj telefona», — paviedamlajecca ŭ pres-relizie SK.
Taksama, pavodle źviestak Śledčaha kamiteta, byli vyjaŭlenyja anałahičnyja fatahrafii, stvoranyja praź niekalki tydniaŭ paśla hetaha. «Na ich 15-hadovy padletak, jaki raniej znachodziŭsia kala biarozy, užo sam imitavaŭ, sa słoŭ siabroŭ, prymianieńnie siły ŭ dačynieńni da byłoha «kryŭdziciela». Taksama na adnym z telefonaŭ majucca fota, dzie hetyja ž padletki uśmichajucca, abdymajučy pa-siabroŭsku adzin adnaho za plečy», — paviedamlaje SK.
Nijakija z hetych fota śledstva hramadskaści nie pradastaviła.
Taćciana, mama 15-hadovaha baranavickaha školnika, jaki skončyŭ žyćcio samahubstvam, z pazicyjaj Śledčaha kamiteta nie zhodnaja.
— Heta tryźnieńnie. Na zdymkach vidać, što majo dzicia płača. Dy i šmat ludziej kažuć, što heta była nie hulnia. Tak razyhryvać dziaŭčynak - vielmi pa-durnomu. Ich možna było i pa-inšamu razyhrać, a nie pryviazvać da dreva i źbivać. Usio robicca dla taho, kab u čarhovy raz zamiać hetuju spravu, — kaža Taćciana.
Siabry zahinułaha padletka, ź jakimi źviazałasia Intex-press, fatahrafii bačyli, ale nie viedajuć, chto na ich.
U hrupie Vkontaktie Intex-press napisali, što było videa, na jakim Ułada bili niekalki čałaviek, u tym liku i pałkami, i jano nie było padobna na pastanoŭku.
Karespandent Intex-press sustrełasia z dvuma chłopcami, jakija hladzieli heta videa.
Vadzimu i Jaŭhienu — pa 18 hadoŭ, abodva byli znajomyja z Uładam paviarchoŭna — bačylisia dva-try razy.
— U kampanii Uład pavodziŭ siabie spakojna i kulturna. Jon byŭ dobrym i viasiołym chłopcam, — kaža Vadzim.
Chłopcy raspaviali, što ŭzimku, paśla hibieli Ułada, kali jany špacyravali kampanijaj u centry horada, sustreli jašče adnu kampaniju, i chtości z moładzi pakazaŭ u telefonie videa, dzie Ułada źbivajuć.
— Hetyja fota — abo skrynšoty ź videa, ci prosta zroblenyja ŭ adzin momant. Videa doŭžyłasia paŭtary-dźvie chviliny. Na im Uład płakaŭ i prasiŭ, kab jaho nie bili. Heta nie hladziełasia jak prykoł, — zapeŭnivaje Vadzim.
Chłopcy kažuć, što na videa Uład byŭ pryviazany da dreva, pobač stajali troje chłopcaŭ, usie z tvarami, zakrytymi futbołkami, — adzin žoŭtaj, druhi zialonaj i treci čyrvonaj. Chłopcy ź zialonaj i čyrvonaj futbołkami bili Ułada nahami, rukami i pałkami. Treci prosta stajaŭ pobač. Na zadnim płanie byŭ čutny śmiech jašče niekalkich čałaviek.
Pa słovach Vadzima, na videa było vidać, što ruki Ułada pryviazanyja da dreva.
— Uład płakaŭ i prasiŭ jaho adpuścić. Na videa havaryŭ tolki Uład. Inšych hałasoŭ nie było. Astatnija moŭčki jaho bili i śmiajalisia, — raspaviadaje Vadzim.
Tady, zimoj, u centry horada ŭ kampanii Vadzima i Jaŭhiena było kala 15 čałaviek. Usie jany, pa słovach chłopcaŭ, heta videa hladzieli.
— Jano było apublikavana Ukantakcie i «visieła» ŭ pierasłanych paviedamleńniach. My sprabavali znajści tych, chto na videa źbivaje Ułada, ale nie zmahli, — kaža Vadzim.
Na dumku chłopcaŭ, uzrost chłopcaŭ ź videa — kala 16 hadoŭ. Tatuirovak abo radzimak, jakija b kinulisia ŭ vočy, u ich nie było.
Adnak Vadzim i Jaŭhien nie pamiatajuć, chto mienavita pakazvaŭ heta videa. Znajści videarolik u internecie Intex-press nie ŭdałosia. Ci ŭdałosia heta zrabić śledstvu, nieviadoma.
Va USK pa Bresckaj vobłaści Intex-press paviedamili, što rasśledavańnie praciahvajecca.
Dzieviacikłaśnik baranavickaj škoły skončyŭ žyćcio samahubstvam u siabie doma 22 śniežnia 2016 hoda. Adnosiny ŭ kłasie ŭ padletka, jaki pierajechaŭ ź Minska, pa słovach mamy i znajomych chłopčyka, nie skłalisia, jon prasiŭ pieravieści jaho z hetaj škoły. Niezadoŭha da samahubstva padletka razam z mamaj vyklikali ŭ škołu na radu prafiłaktyki z-za bojki z adnakłaśnikam. Pa słovach mamy zahinułaha chłopčyka, na radzie prafiłaktyki administracyja škoły cisnuła na jaje dzicia i pahražała kałonijaj. Syn mocna pieražyvaŭ toje, što adbyvajecca.
USK pa Bresckaj vobłaści raspačało kryminalnuju spravu pa artykule «Daviadzieńnie da samahubstva». Z vosieni 2016 hoda kryminalnaja sprava abaviazkova ŭzbudžajecca ŭ vypadku samahubstva niepaŭnaletniaha: heta daje śledstvu bolš mahčymaściaŭ pravieści pravierku.
Mama zahinułaha padletka ŭ svaju čarhu źviarnułasia ŭ hienprakuraturu i Administracyju prezidenta z prośbaj ab dapamozie ŭ rasśledavańni spravy, «kab vinavatyja panieśli pakarańnie». U sakaviku rasśledavańnie pa fakcie suicydu baranavickaha padletka spynili «ŭ suviazi z adsutnaściu ŭ čyich-niebudź dziejańniach składu złačynstva». Maci zahinułaha padletka abskardziła hetuju pastanovu.
