Anamalnaja śpioka ŭ subotu pryjšła va Uschodniuju Jeŭropu i pačała adzin za adnym abnaŭlać tempieraturnyja rekordy.
U Rumynii słupok termomietra padnianŭsia vyšej za adznaku ŭ plus 42 hradusy, u Bałharyi pavietra ŭvohule prahrełasia da 44 hradusaŭ.
Ekstremalnyja ŭmovy ŭžo pryviali da čałaviečych achviar, ułady abviaścili krytyčny ŭzrovień pahodnaj niebiaśpieki.
U Bałharyi haračej za ŭsio ŭ subotu było ŭ horadzie Rusie na Dunai, dzie, pavodle Nacyjanalnaha instytuta mietearałohii i hidrałohii Bałharskaj akademii navuk, tempieratura dasiahnuła rekordnych 44 hradusaŭ. Akramia taho, tempieraturny rekord (za 115 hadoŭ mieteanazirańniaŭ) byŭ ustalavany ŭ Plevienie: 40 hradusaŭ u cieni (na 3 hradusy vyšej, čym było ŭ 1963 hodzie), pieradaje TASS.
U stalicy Bałharyi Safii z-za vysokich tempieratur zahinuli piać čałaviek, 180, u tym liku dzieci i ludzi stałaha vieku, źviarnulisia pa miedycynskuju dapamohu. Pa ŭsioj krainie kolkaść paciarpiełych dasiahnuła niekalkich socień.
Amal va ŭsioj Bałharyi abjaŭleny krytyčny ŭzrovień niebiaśpiečnych mietearałahičnych źjaŭ.
U Rumynii pa ŭsioj krainie termomietry pieravysili adznaku ŭ plus 40 hradusaŭ, u paŭdniovym horadzie Džurdžu było asabliva horača — plus 42. U 19 paŭdniovych i ŭschodnich pavietach krainy, uklučajučy Bucharest, uviedzieny maksimalny «čyrvony kod» pahodnaj niebiaśpieki, jaki aznačaje «mocnuju śpiakotu i ciepłavy dyskamfort».
Rumynskija mietearołahi paviedamlajuć, što nočy ŭ krainie ŭ najbližejšyja dni buduć «trapičnymi», termomietry nie buduć apuskacca nižej za 20 hradusaŭ, a indeks tempieratury i vilhotnaści pieravysić krytyčny paroh u 80 adzinak. Takoje papiaredžańnie Nacyjanalnaja mietearałahičnaja administracyja da hetaha času rabiła tolki dvojčy za ŭsiu historyju.
Ułady Rumynii adkryli ŭ haradach punkty pieršaj dapamohi i zabieśpiačeńnia pitnoj vadoj, vadu taksama razdajuć pasažyram u hramadskim transparcie. Na darohach zabaronieny ruch bujnatanažnaha transpartu z-za raspalenaha asfaltu, źmienšanaja chutkaść ruchu ciahnikoŭ, pakolki ŭ asobnych miescach na ŭzroŭni hleby tempieratura pieravyšaje plus 50.
U Biełarusi siońnia i ŭ nastupnyja dni — kala +20, miescami karotkačasovyja daždžy.
