15 śniežnia minułaha hoda 5-hadovy Bredli Łoŭery vyjšaŭ na pole pierad matčam «Sanderlenda» suprać «Čełsi» i zabiŭ hoł u varoty Aśmira Biehaviča. Heta była dabračynnaja akcyja, arhanizavanaja «Sanderlendam» u padtrymku svajho junaha zaŭziatara.
U pačatku studzienia BBC abviaściła, što dva najlepšyja miačy śniežnia zabili Hienrych Mchitaran i Bredli Łoŭery.
U paŭtara hoda ŭ chłopčyka była dyjahnastavana niejrabłastoma, rak niervovaj sistemy. Bolš za dva hady lačeńnia prynieśli vynik — nastupiła remisija. Ale praz hod rak viarnuŭsia.
«Sanderłend» uziaŭ małoha pad svajo kryło čatyry hady tamu, i za hety čas Bredli staŭ samym znakamitym zaŭziataram kłuba. Za jaho losam sačyła ŭsia premjer-liha — i futbalisty, i zaŭziatary.
Bredli nie raz vychodziŭ na pole razam z hulcami «Sanderlenda», a adnojčy navat vyjšaŭ na matč zbornaj Anhlii suprać Litvy — razam z Džermejnam Defo, jaki tady byŭ kapitanam kamandy.
Defo asabliva mocna pasiabravaŭ z Bredli, i ŭviesnu pabyvaŭ na jaho šostym dni naradžeńnia.
A 1 lipienia jany bačylisia apošni raz — Džermejn pryjazdžaŭ naviedać maleńkaha siabra.
U čaćvier u «Bornmuta» była pres-kanfierencyja da adkryćcia siezona, na jakoj byŭ i Džermejn Defo, jaki pierajšoŭ hetym letam z «Sanderlenda». Jon užo viedaŭ, što stan Bredli rezka pahoršyŭsia. Kali jaho spytali pra chłopčyka, Džermejn nie zmoh strymać śloz.
Siońnia razam ź im płača ŭvieś śviet. Bredli Łoŭery nie stała.
