Sakrataryjat abaronnaj pramysłovaści Turcyi pryniaŭ rašeńnie zakupić zienitna‑rakietnyja kompleksy S‑300, S‑300V i «Tor» dla praviadzieńnia palavych vyprabavańniaŭ sistemy radyjoelektronnaj baraćby EHTS, raspracavanaj tureckaj kampanijaj Havelsan.
Ab hetym paviedamlaje hazieta Today's Zaman. Pierakład artykuła pryvodzić resurs Lenta.ru.
Pa dadzienych krynic u abaronnaj pramysłovaści Turcyi, puskavyja ŭstanoŭki buduć zakazanyja ŭ Biełarusi i Ŭkrainie prykładna za 100 młn. dalaraŭ. Rašeńnie ab hetym było pryniataje nibyta jašče 22 červienia, adnak aficyjna ab im nie paviedamlałasia.
Pavodle infarmacyi, što majecca ŭ rasparadžeńni tureckaha vydańnia, uvachodnyja ŭ skład zienitnych kompleksaŭ radyjołakacyjnyja stancyi i sistemy ŭpraŭleńnia buduć zamoŭlenyja asobna. Puskavyja ŭstanoŭki płanujecca vykarystać vyklučna dla vyprabavańniaŭ.
Zakuplanaja technika budzie razhornutaja na bazie vučebnaha centra Końja ŭ Anatolii dla adpracoŭki taktyki padaŭleńnia sistem supraćpavietranaj abarony krain, na ŭzbrajeńni jakich majucca anałahičnyja ŭzory. Da takich krain, u pryvatnaści, adnosicca Hrecyja, jaka tradycyjna razhladajecca tureckim vajenna‑palityčnym kiraŭnictvam u jakaści najbolš vierahodnaha supiernika. Akramia hetaha, Ankara raźličvaje na toje, što vyprabavańni dazvolać dakładna ŭstalavać najaŭnaść albo adsutnaść ZRK S‑300 na ŭzbrajeńni Kipra.
U adpracoŭcy taktyki supraćdziejańnia zienitnym kompleksam rasiejskaj vytvorčaści ŭ asnoŭnym buduć zadziejničanyja źniščalniki F‑16, abstalavanyja sistemami EHTS. Na dadzieny momant, jak paviedamlaje Today's Zaman, bajavyja samaloty VPS Turcyi ŭžo pierakinutyja z avijabazy Eskišechir u vučebny centr Końja prykładna ŭ 250 kiłamietrach ad Ankary.
Dadzienaje paviedamleńnie tureckaj haziety ŭ biełaruskich dziaržorhanach pakul nie kamientujuć.
U ciapierašni čas try zienitnyja rakietnyja bryhady Ŭzbrojenych sił Biełarusi abstalavanyja kompleksami S‑300: 15‑ia (štab u Fanipali, Mienskaja vobłaść), 147‑ia (štab u Babrujsku) i 115‑ia (štab u Breście). Pryčym apošniaja atrymała ZRK S‑300 PS tolki ŭ 2006 hodzie.
