Barysaŭski BATE zdoleŭ prabicca ŭ nastupny kvalifikacyjny raŭnd Lihi čempijonaŭ. Pieramoha nad armianskim «Ałaškiertam» z upeŭnienym likam 3:1 nie musić padmanvać zaŭziataraŭ — jaje daviałosia vyryvać na žyłach.
Fota Sputnik.
Pačniem z taho, što lik niečakana adkryli armianie. Abaroncy BATE nie parazumielisia i pakinuli napadnika «Ałaškierta» sam-nasam z bramnikam Dzianisam Ščarbickim. Toj nie zdoleŭ vyratavać kamandu.
Paśla pieršaha matča, jaki skončyŭsia ź likam 1:1, fłanhavy abaronca BATE Maksim Žaŭnierčyk dosyć rezka vykazaŭsia nakont pracy treniera Alaksandra Jermakoviča i niekatorych svaich kaleh pa kamandzie. U vyniku ŭ Jerevan jon nie palacieŭ, nibyta pa pryčynie traŭmy. Abaroncaŭ daviałosia pierastaŭlać z pazicyi na pazicyju, u ich dziejańniach adčuvałasia niaŭpeŭnienaść.
Na ščaście, litaralna praź niekalki chvilin Michaił Hardziajčuk zdalok prabiŭ pa varotach «Ałaškierta», dy jašče i ŭ samy kut.
Nieŭzabavie jon ža zabiŭ jašče adzin hoł, faktyčna pachavaŭšy intryhu ŭ matčy.
U druhim tajmie biełarusy bolš-mienš kantralavali chod matča. Naprykancy hulni Maksim Vaładźko zabiŭ jašče adzin hoł paśla hrubaj pamyłki armianskaha bramnika — 3:1.
Praŭda, ahułam BATE prabiŭ dakładna pa varotach supiernika ŭsiaho try razy. I ŭsie hetyja momanty skončylisia hałami!
Adnak hałoŭnaje — pieramoha. U paralelnym matčy inšy favaryt, šviedski «Malmio» paśla takoj samaj chatniaj ničyjoj niečakana vylecieŭ, sastupiŭšy makiedonskamu «Vardaru». A voś barysaŭski kłub rušyć dalej.
Ciapier BATE zhulaje z pražskaj «Słavijaj». Nastupny matč adbudziecca ŭžo na nastupnym tydni.