Amierykanski akcior i dramaturh, łaŭreat Pulitceraŭskaj premii Sem Šepard pamior na 74-m hodzie žyćcia. Pra heta ŭ paniadziełak, 31 lipienia, paviedamlaje Associated Rress.
Jak raspavioŭ pradstaŭnik siamji Šeparda, jon pamior 27 lipienia ad uskładnieńniaŭ, źviazanych z chvarobaj Łu Hieryha (bakavoha amijatrafičnaha sklerozu).
Šepard źniaŭsia ŭ niekalkich dziasiatkach filmaŭ, siarod jakich «Frensis», «Paryž, Techas», «Stalovyja mahnolii», «Sprava pra pielikana», «Dziońnik pamiaci», «Parol «Ryba-mieč»», «Čorny jastrab», «Jak bajaźlivy Robiert Ford zabiŭ Džesi Džejmsa». U 1984 hodzie byŭ naminavany na «Oskar» za rolu druhoha płana ŭ karcinie «Chłopcy što treba». Apošniaj akciorskaj pracaj Šeparda stała rola ŭ sieryjale «Radavod».
Sem Šepard taksama aŭtar niekalkich dziasiatkaŭ pjes - «Varjactva kachańnia», «Sapraŭdny Zachad», «Praklon haładajučaha kłasu», «Viek miesiaca» i inšych. U 1979 h. atrymaŭ Pulitceraŭskuju premiju za dramu «Pachavanaje dzicia».
Jon aŭtar scenara da takich filmach, jak «Paryž, Techas», «Čamu durni zakochvajucca», «Zabryski-pojnt» (suaŭtar, razam z Tanina Huera i Mikiełandžeła Antanijoni) i inšyja. U 1994 hodzie na ekrany vyjšła jaho režysiorskaja rabota - viestern «Mova maŭčańnia».
