Mer Vilni Remihijus Šymašus skazaŭ, što z uradam uzhadniajucca płany stvareńnia Vilenskaj svabodnaj ekanamičnaj zony (SEZ), paviedamlaje Delfi.
Jana mahła b być stvorana ŭ paŭdniovaj častcy horada, u Pahirach, dzie ciapier dziejničaje Vilenski łahistyčny park i intermadalny terminał. Hetuju ideju mer u sieradu abmierkavaŭ z premjeram Saŭlusam Skviarnialisam.
«My abmierkavali mahčymaść pabudavać zavody vakoł Vilni — prajekt industryjalnaha parku abo SES. My damovilisia z samakiravańniem Vilniuskaha rajona, uradam razam hetym zaniacca. Pobač z Pahirami, dzie namiečany łahistyčny park, my syšlisia ŭ mierkavańni, što tam lepšaje miesca i my šukajem sposaby, jak heta zrabić prydatnym dla vytvorčaści», — zajaviŭ paśla sustrečy z premjeram Šymašus.
Jon ličyć, što treba acanić vyhadu pramzony ŭ miežach Vilni i Vilenskaha rajona dla pavyšeńnia kankurentazdolnaści krainy, zajaviŭ daradca mera Tomas Biaržynskas.
Šymašus skazaŭ, što doŭhija hady imknulisia «vycisnuć inviestycyi ź Vilni» ŭ inšyja municypalitety, i heta adpužvała inviestaraŭ ad Litvy.
Vilenskaje samakiravańnie razam ź litoŭskaj čyhunačnaj kampanijaj Lietuvos gelezinkeliai vałodaje łahistyčnym parkam, płoščaj 460 hiektaraŭ, jaki raźvivajecca vakoł Vilenskaha intermadalnaha terminała, jaki byŭ adkryty ŭ 2015 hodzie i kaštavaŭ 36,7 młn jeŭra.
