22-hadovy žychar Homiela raźmiaściŭ u internecie abjavu pra prodaž matacykła «Suzuki GSX 1300R» Pakupniki znajšlisia ŭ Rasii. Dva pryjacieli z Kurskaj vobłaści pryjechali ŭ abłasny centr, i pačali šukać sustrečy z pradaŭcom, paviedamlaje pres-słužba abłasnoj milicyi.
Viečaram u piatnicu rasijanie pryjechali ŭ v. Ramanavičy Homielskaha rajona. Praź niekatory čas na matacykle «Yamaha FZ6» padjechaŭ i pradaviec. U chodzie abmierkavańnia kupli-prodažu adzin z pakupnikoŭ, uziaŭšy ŭ ruki małatok z humavaj hałoŭkaj, staŭ nanosić udary pradaŭcu pa hałavie i inšych častkach cieła. Małady chłopiec upaŭ. Nalotčyki, zavałodaŭšy dvuma bajkami, źjechali ź miesca złačynstva. Svajačka paciarpiełaha, ubačyŭšy ŭ akno doma, jak małady čałaviek sprabuje ŭstać ź ziamli, vyklikała chutkuju dapamohu i milicyju.
Aryjenciroŭka była nakiravana va ŭsie rajonnyja adździeły milicyi vobłaści.
Pahoniu ŭznačalili major milicyi Rusłan Kaleśnikaŭ i kapitan Alaksandr Jakaŭcoŭ, što pravodzili rejdavyja mierapryjemstvy ŭ Dobrušskim rajonie.
Pry padjeździe da pasiołka Miadźviedžy Łoh supracoŭniki ŭbačyli dva matacykły, jakija ruchalisia na vialikaj chutkaści ŭ bok miažy z Rasijaj. Na adnym ź ich nie było rehistracyjnaha znaka. Milicyjanty źviazalisia z apieratyŭna-dziažurnaj słužbaj. Staršy apieratyŭny dziažurny Dźmitryj Šyškoŭ addaŭ kamandu iści za bajkami, ale nie zatrymlivać. Siłavyja viedamstvy na kantrolna-prapusknym punkcie «Sielišča» ŭžo byli papiaredžany, rychtavalisia błakavać i zatrymlivać zhonščykaŭ.
Ale matacyklisty zbočyli z trasy ŭ kirunku v. Karma. Za mietraŭ trysta spynilisia. Milicejski aŭtamabil prajechaŭ za imi. Rusłan Kaleśnikaŭ i Alaksandr Jakaŭcoŭ, miarkujučy, što złamyśniki pasprabujuć abjechać punkt propusku, vyrašyli pajści na zatrymańnie. Błakavaŭšy, nakolki heta było mahčymym, matacykły, dziaržaŭtainśpiektary vyskačyli z mašyny. Złačyncy, pabačyŭšy milicyjantaŭ, mamientalna zaviali bajki i pasprabavali źbiehčy.
Ale Alaksandr Jakaŭcoŭ paśpieŭ skočyć na «Jamachu», što ŭžo nabirała chutkaść, i pavalić matacykł na ziamlu.
Toj, chutka ustaŭšy, pasprabavaŭ źbiehčy. Rusłan Kaleśnikaŭ, što padaśpieŭ na dapamohu, zatrymaŭ jaho.
Druhomu rasiejcu na «Suzuki» usio ž udałosia źbiehčy, jon abvieščany ŭ vyšuk, ale jaho asoba vyśvietlena.
Na miesca zatrymańnia była vyklikana śledča-apieratyŭnaja hrupa. U chodzie praviadzieńnia ahladu siarod asabistych rečaŭ 23-hadovaha rasijanina znajšli čornuju viazanuju šapku z prarezami dla rota i vačej.
Pradaviec matacykła ź ciažkimi traŭmami špitalizavany i znachodzicca ŭ reanimacyi.
