Biełaruski samalot Ił-76 kampanii «Transavijaekspart», jaki vykonvaje avijacyjnyja raboty pad ehidaj AAN, pry zachodzie na pasadku ŭ horadzie Džuba, stalicy Paŭdniovaha Sudana, začapiŭ dach doma, razburyŭšy jaho, paviedamiła 24 žniŭnia vydańnie The Aviation Herald. Pa dadzienych ŚMI, u vyniku incydentu zahinuła piacihadovaja dziaŭčynka, taksama paciarpieli jašče niekalki čałaviek. U kampanii pieravozčyka paćvierdzili fakt zdareńnia, adnak pra achviaraŭ i pryčyny incydentu pakul ničoha nie viadoma.
Samalot pieravoziŭ humanitarnuju dapamohu. ŚMI i ŭ kampanii «Transavijaekspart» zajavili, što pasadka prachodziła ŭ składanych umovach nadvorja — išoŭ mocny doždž, bačnaść była drennaj.
Kali samalot prarvaŭsia skroź abłoki, sudna pajšło na pasadku. Piłoty vypuścili šasi, ale samalot začapiŭsia za dreva i adnapaviarchovy dom, razburyŭšy jaho, taksama frahmient ruchavika upaŭ na inšy dom. Sudna nie zmahło pryziamlicca ŭ Džubie i avaryjna sieła ŭ aeraporcie Entebie Uhandy.
ŚMI paviedamlajuć pra hibiel piacihadovaj dziaŭčynki ŭ vyniku incydentu. Taksama viadoma. što paciarpieli jašče dvoje dziaciej i dźvie žančyny.
Namieśnik dyrektara pa piersanale AAT «Avijakampanija Transavijaekspart» Ihar Sikorski paćvierdziŭ, što ź ich samalotam u Paŭdniovym Sudanie adbyłasia avaryja. Kamandzir ekipaža paviedamiŭ ab paškodžańni samalota, adnak pra achviaraŭ i paciarpiełych u kampanii pakul niama infarmacyi.
Pa słovach Sikorskaha, Mintrans stvaryŭ kamisiju, jakaja adpraviłasia na miesca dla vyśviatleńnia pryčyn i nastupstvaŭ.
