Razam z raniej abvieščanymi ŭkraincami Onuka chedłajnierami fiestyvalu ŭ hetym hodzie buduć Theodor Bastard (Rasija), Shuma (Biełaruś) i The Doox (Ukraina). Taksama na hałoŭnaj scenie vystupiać biełaruskija hurty «Nahual», Shaman Jungle i «Varhan».
Druhaja scena fiestyvalu budzie całkam pryśviečana aŭtentyčnamu biełaruskamu falkłoru, jaki prahučyć u vykanańni ansamblaŭ «Rada», «Miareža», «Horyń» i junaj Patrycyi Śvicinaj. Heta placoŭka budzie pracavać u pierapynkach pamiž vystupami artystaŭ hałoŭnaj sceny, dazvalajučy zrabić muzyčnuju prahramu mierapryjemstva niepieraryŭnaj.
Fiestyval adbudziecca ŭ Muziei narodnaj architektury i pobytu ŭ pasiołku Aziarco pad Minskam (4 kiłamietry ad MKAD za aŭtarynkam «Malinaŭka»). Akramia muzyki hledačoŭ čakaje vialiki kirmaš narodnych promysłaŭ, majstar-kłasy ramieśnikaŭ, viaskovyja zabavy, vystavy mastakoŭ i fatohrafaŭ.
— «Kamianica» — heta śviata dla ŭsich, chto cikavicca narodnaj kulturaj Biełarusi i susiednich krain va ŭsich jaje prajavach. Čystaja aŭtentyka i sučasnyja interpretacyi fołku, u tym liku aŭtarskija tvory, dla nas adnolkava važnyja. Hałoŭnaje — pavaha da svajoj nacyjanalnaj kultury, — kamientuje viadoŭca fiestyvalu Aleh Chamienka.
Usie hrošy ad kvitkoŭ iduć na rachunki muzieja, dapamahajučy zachoŭvać unikalnuju kalekcyju aŭtentyčnaj biełaruskaj draŭlanaj architektury 18-20 stahodździaŭ, sabranuju ŭ roznych rehijonach krainy.
Papiarednie kvitki kaštujuć da 10 rubloŭ (darosły), u dzień fiestyvalu košt uźnimiecca da 15 rubloŭ (darosły). Papiaredni prodaž u sistemach Bycard.by i SMSbilet.by. Dla dziaciej daškolnaha ŭzrostu ŭvachod biaspłatny. Infalinija: (029) 363 76 85, (017) 209 41 63.
***
Onuka (Ukraina)
Adzin z hałoŭnych simvałaŭ sučasnaj ukrainskaj muzyki, čyj spłaŭ elektroniki, fołku i duchavych instrumientaŭ uraziła navat brytanski New Musical Express. Paśla vystupu ŭ jakaści haściej finała «Jeŭrabačańnia — 2017» u Kijevie zapisy hurta apynulisia ŭ chit-paradach iTunes u Vialikabrytanii, Niamieččynie, Polščy, Niderłandach, Danii, Šviecyi, Bielhii, Francyi, Šviejcaryi i Aŭstralii.
Theodor Bastard (Rasija)
Hurt stvorany ŭ 1996 hodzie i źjaŭlajecca adnym z hałoŭnych rasijskich pradstaŭnikoŭ world music. Vizitnaja kartka kalektyva — hołas vakalistki Jany Vievy, jakaja taksama źjaŭlajecca aŭtaram šerahu piesień. Akramia Rasii albomy Theodor Bastard vydavalisia ŭ Hiermanii, Turcyi, Mieksicy dy Arhiencinie. Kalektyŭ vystupaŭ na fiestyvalach u Hiermanii, Vienhryi, Rumynii, Litvie i inšych krainach Jeŭropy.
Shuma (Biełaruś)
Muzyki nazyvajuć svoj styl digital archaica, bo jon jadnaje biełaruskija narodnyja pieśni i sučasnyja elektronnyja hučańni. Abodva studyjnyja albomy kalektyva — «Žnivo» (2015) i «Sonca» (2016) — atrymali vysokija adznaki ad biełaruskich i zamiežnych krytykaŭ. Akramia taho jany prynieśli hurtu šmat uznaharod, siarod jakich «Albom hoda» pa viersii Experty.by (2016). U aktyvie Shuma vystupy ŭ ZŠA, Polščy, Finlandyi, Ukrainie, Litvie.
The Doox (Ukraina)
Małady etna-rokavy kalektyŭ, viadomy svaimi apracoŭkami narodnych piesień z roznych kutkoŭ Ukrainy. U ich adnolkava ŭdała atrymlivajucca mieładyčnyja bałady i dynamičnyja numary. Uviasnu 2017 muzyki vydali debiutny albom «Dierievo». Udzielniki ŭsich hałoŭnych ukrainskich festaŭ, u tym liku: «Krajina mrij», «Tripilśkie koło», Atlas Weekend.
