Pa słovach miascovaha paleantołaha Rejmanda Rodžersa, na adnym tolki ŭčastku pamieram utraja mienšym za tenisny kort jamu z kalehami ŭdałosia identyfikavać pareštki 1200 roznych vidaŭ.
Što ž vyklikała hetuju masavuju hibiel? Miarkujecca, što vinoj usiamu mahła stać praciahłaja zasucha, na fonie jakoj tut prachodzili karotkija, ale vyklučna mahutnyja zalevy. Jany stvarali časovyja patoki vady, znosiačy pareštki pamierłych žyviołaŭ razam i nakryvajučy ich hlejem.
Ź inšaha boku, z hetym zhodnyja daloka nie ŭsie. Stanovišča kostak pakazvaje, što, chutčej za ŭsio, žyvioły byli pachavanyja tam ža, dzie i zahinuli. Usio zdaryłasia davoli chutka — nieviadomy zabojca byŭ adnolkava niebiaśpiečny i dla latučych, i dla poŭzajučych, dla drapiežnikaŭ i travajednych.
Na štohadovaj sustrečy Tavarystva paleantałohii chrybietnych, jakaja prajšła niadaŭna, była ahučanaja novaja niezvyčajnaja viersija. Pavodle navukoŭcaŭ, vyhnutaja poza, jakuju zachavali pareštki, moža pakazvać na pieradśmiarotnyja kanvulsii, a adkładańni karbanataŭ — na aktyŭny rost bahavińnia. Takoje «ćvicieńnie» całkam zdolnaje stać pryčynaj masavaj hibieli žyvioł, jakija prychodziać na vadapoj ci žyvuć u vadzie. Dastatkova skazać, što dynafłahielaty i cyjanabakteryi vyłučajuć saksitaksin, nadzvyčaj niebiaśpiečnaje złučeńnie, śmiarotnaje dla čałavieka ŭžo ŭ kolkaści 0,14 mh.
Naprykład, u epochu mijacenu ŭ mory na terytoryi ciapierašniaje dziaržavy Čyli takoje vymirańnie zdarałasia nie raz: vada z taksičnym bahavińniem vyklikała hibiel kitoŭ i ryb, škilety jakich siońnia znachodziacca ŭ pustyni Atakama. Jość padazreńni, što bahavińnie stała pryčynaj utvareńnia i niekatorych inšych bahatych paleantałahičnymi znachodkami miescaznachodžańniaŭ. Na žal, pakul što pramych dokazaŭ hetamu — dakładnych śladoŭ bahavińnia — nie znojdziena.
