U Hrodnie pačali vyrablać tratuarnuju plitku z pakietaŭ-majek i inšych upakovak. Pra heta paviedamiŭ BIEŁTA dyrektar Hrodzienskaha zavoda pa ŭtylizacyi i miechaničnym sartavańni adchodaŭ Viačasłaŭ Andrejeŭski.
Ciapier na pradpryjemstvie idzie naładka abstalavańnia pa vytvorčaści novaha vidu pradukcyi — palimierna-piasčanych vyrabaŭ. Tut pačali vypuskać niekalki vidaŭ pradukcyi, asnoŭnaj syravinaj dla jakich vystupajuć palimiery, adpraŭlenyja na śmietnik žycharami horada, i zvyčajny piasok.
«Paśla zapusku zavoda ŭ nas pačali nazapašvacca palimiery nizkaj jakaści, jakija pakul nie pierapracoŭvajucca ŭ Biełarusi. Heta ŭvieś «chrumstki» płastyk, pakiety-majki, upakoŭka ad tartoŭ, naprykład, i inšyja vyraby. Vyrašyli znajści sposab, kab puścić ich u spravu», — adznačyŭ Viačasłaŭ Andrejeŭski. Dla hetych metaŭ była nabytaja linija pa vytvorčaści palimierna-piasčanych vyrabaŭ. Pryncyp jaje raboty prosty: palimiery zdrabniajucca, źmiešvajucca ŭ peŭnaj praporcyi ź piaskom, u śpiecyjalnaj mašynie sumieś nahravajuć da 250 hradusaŭ, zatym atrymanaja masa pastupaje pad pres, z-pad jakoha i vychodziać hatovyja vyraby.
Pakul asartymientny pieralik uklučaje ŭ siabie siem pazicyj — niekalki vidaŭ plitki, bardziurny kamień i zialonaja ekaparkoŭka. Zrešty, roznyja pres-formy dazvalajuć vypuskać bolš za 150 vidaŭ pradukcyi, u tym liku rašotki liŭniovak, kanalizacyjnyja luki.
«Kali paraŭnoŭvać ź bietonnymi vyrabami, to plitka z palimieraŭ kudy tryvalejšaja pry ŭdarach, nahruzkach, jana nie ŭbiraje vadu, nie pakryvajecca lodam zimoj, lahčejšaja pa vazie i praściejšaja ŭ kładcy. Košt takich vyrabaŭ pryblizna na 20% mienšy za anałahi ź bietonu», — adznačaje Viačasłaŭ Andrejeŭski. Ciapier pradukcyja prachodzić siertyfikacyju. U jakaści ekśpierymientu na zavodzie vykłali ź plitki ŭłasnaj vytvorčaści nievialikuju placoŭku, narakańniaŭ pa ekspłuatacyjnych ułaścivaściach niama.
Na zavodzie adznačajuć, što jašče na stadyi zapusku vytvorčaści da novaj pradukcyi paŭstała cikavaść. Pryčym jak z boku pryvatnych asob, tak i z boku kamunalnych arhanizacyj horada. U pryvatnaści, novuju plitku płanujecca vykarystoŭvać dla kładki na kantejniernych placoŭkach u Hrodnie. Pry trochźmiennym režymie pracy ŭ sutki linija zmoža vypuskać da 2 t palimierna-piasčanych vyrabaŭ. Na siońnia adnaho tolki płastyku (upakovak i pakietaŭ), prydatnaha dla vypusku plitki i nieprydatnaha dla inšaj pierapracoŭki, tut sabrałasia kala 70 t.
Štodnia na zavod, jaki pracuje ŭ kruhłasutačnym režymie i biez vychadnych, u siarednim pastupaje kala 220 t źmiešanych adchodaŭ. Praź liniju sartavańnia prachodzić usio hienieravanaje abłasnym centram śmiećcie. Usie vyniatyja druhasnyja resursy adpraŭlajucca na pierapracoŭku. Pradpryjemstva budavałasia pa prajekcie kompleksnaha abychodžańnia z adchodami. Zavod budzie pierapracoŭvać da 120 tys. t adchodaŭ u hod. Akramia budaŭnictva zavoda ŭ horadzie, ustanoŭlenyja zvyš 30 tys. kantejnieraŭ dla paasobnaha zboru śmiećcia, zakuplenyja zvyš za 50 novych śmiećciavozaŭ.
