U hetyja vychadnyja Minsk adznačaje 950-hodździe. Śviatočnych mierapryjemstvaŭ zapłanavana mnostva, i, mahčyma, siarod ich vy znojdziecie što-niebudź sabie pa dušy.
Karotkaja prahrama na 9 vieraśnia vyhladaje prykładna tak.
Z 11.30 na placoŭcy kala Pałaca sportu pačniecca kancertnaja prahrama, razhorniecca śviatočny handal i vystava-kirmaš majstroŭ mastactvaŭ. Adbudziecca fiestyval mastactvaŭ biełarusaŭ śvietu. Na 20.00 tut zapłanavany kancert Prezidenckaha arkiestra Biełarusi.
U kancertnaj zale pa tradycyi projdzie cyrymonija zaklučeńnia šlubu dzieviaci par z usich rajonaŭ Minska. Cyrymonija ŭručeńnia ŭznaharod «Minčanin hoda» i śviatočny kancert majstroŭ mastactvaŭ sioleta prymie Nacyjanalny akademičny Vialiki teatr opiery i baleta.
Zavieršyć subotnija mierapryjemstvy śviatočny salut u 23.00 u rajonie Pałaca sportu.
Niekatoryja mierapryjemstvy, pryśviečanyja śviatkavańniu jubilejnaj daty biełaruskaj stalicy, buduć prachodzić na praciahu niekalkich dzion. Naprykład, 9-10 vieraśnia adbudziecca fiestyval histaryčnaj rekanstrukcyi «Minsk staražytny», hałoŭnaja placoŭka jakoha razhorniecca na skryžavańni praśpiektaŭ Pieramožcaŭ i Mašerava. Ciapier tut uzvodzicca rycarski haradok ź viežami, miescam dla spabornictvaŭ, namiotavym łahieram, trybunami dla hledačoŭ. Hledačy zmohuć ubačyć sceny z roznych epoch: z XIII stahodździa da II suśvietnaj vajny. Kanceptualna fiestyval ŭjaŭlaje ź siabie teatralizavanaje vidovišča z udziełam nie tolki prafiesijanałaŭ histaryčnaj rekanstrukcyi, ale i amataraŭ.
Kancertnyja prahramy čakajuć minčan i haściej va ŭsich administracyjnych rajonach horada. U pryvatnaści, jany zapłanavanyja ŭ parku «Kurasoŭščyna», u parku Družby narodaŭ, na aeradromie Baravaja i aeraporcie Minsk-1. Buduć pravodzicca śviaty vulic, spartyŭnyja mierapryjemstvy, konkursy.
Asnoŭnaja śviatočnaja placoŭka raźmieścicca na terytoryi ad Vierchniaha horada da parku Pieramohi. Maksimalnaja kancentracyja handlovych abjektaŭ budzie la Pałaca sportu. 9 vieraśnia z 10.00 da 23.00 i 10 vieraśnia z 10.00 da 17.00 tut raźmieścicca vializny fud-kort na 2,5 tys. pasadačnych miescaŭ.
Heta daloka nie ŭsie mierapryjemstvy, zapłanavanyja na vychadnyja. Bolš padrabiazna z prahramaj śviatkavańniaŭ u Minsku i za horadam možna aznajomicca na sajtach BIEŁTA i Relax.by.
