Sotni tysiač čałaviek vyjšli na vulicy Barsiełony ŭ Nacyjanalny dzień Katałonii ŭ paniadziełak, kab padtrymać adździaleńnie aŭtanomii ad Ispanii. Praz try tydni maje adbycca refierendum, praviadzieńnia jakoha Madryd sprabuje nie dapuścić, piša VVS.
GG
Vulicy horada zapoŭnilisia ludźmi sa ściažkami-esteładami. Čyrvona-žoŭtaja estełada — nieaficyjny ściah katałonskich ziamiel i simvał baraćby za niezaležnaść pravincyi.
Refierendum ab niezaležnaści Katałonii, jaki ŭrad Ispanii zahadzia abviaściŭ niezakonnym, pavinien adbycca praz try tydni, 1 kastryčnika. Parłamient pravincyi, u jakim daminujuć partyi, što vystupajuć za niezaležnaść, pryniaŭ zakon ab adździaleńni ad Ispanii, kali katałoncy za heta prahałasujuć.
Miarkujučy pa apošnich apytańniach, mierkavańni žycharoŭ Katałonii z nahody adździaleńnia padzialilisia amal paroŭnu.
Katałonija — adzin z samych bahatych rehijonaŭ Ispanii. U składzie karaleŭstva pravincyja maje status aŭtanomnaj supolnaści. U Katałonii svaja palicyja i svaja aficyjnaja mova, jakaja vykarystoŭvajecca naroŭni ź ispanskaj.
Adnak u rehijonie dosyć raspaŭsiudžanaje mierkavańnie, što zanadta vialikaja častka jaho dachodaŭ sychodzić u Madryd u jakaści padatkaŭ.
Ekanamičnyja prablemy Ispanii paśla hłabalnaha kryzisu 2008 hoda — u pieršuju čarhu biespracoŭje — pryviali da rostu ŭ Katałonii sieparatysckich nastrojaŭ.
Acenki kolkaści ŭdzielnikaŭ šeścia adroźnivajucca: arhanizatary śćviardžajuć, što na vulicy u paniadziełak vyjšła bolš za miljon čałaviek, ale acenki čynoŭnikaŭ ź ispanskaha ŭrada ŭ niekalki razoŭ nižejšyja. Kab źvieźci ludziej u Barsiełonu ź inšych katałonskich haradoŭ, było arendavana amal 2000 aŭtobusaŭ.
Getty
Napiaredadni maršu ispanskaja Hramadzianskaja hvardyja, jakaja padparadkoŭvajecca Madrydu, na praciahu niekalkich dzion pravodziła rejdy pa drukarskich majsterniach u pošukach niezakonnaj ahitacyi abo addrukavanych biuleteniaŭ dla refierendumu.
U vieraśni Žienieralitat Katałonii pryniaŭ zakon ab refierendumie i spadarožnyja dakumienty, u pryvatnaści — ab farmavańni vybarčaj kamisii i pryncypach arhanizacyi hałasavańnia.
Ale nieŭzabavie Kanstytucyjny sud Ispanii na nadzvyčajnym pasiadžeńni prypyniŭ dziejańnie ŭsich hetych dakumientaŭ. Ułady Ispanii taksama papiaredzili katałonskija ŚMI, dziaržsłužačych i kiraŭnictva palicyi aŭtanomnaj vobłaści ab nastupstvach nievykanańnia sudovych rašeńniaŭ.
Getty
Niahledziačy na sudovaje błakavańnie, udzielniki šeścia spadziajucca, što referendum usio ž projdzie. Mnohija ź ich pryjšli ŭ majkach koleraŭ katałonskaha ściaha i navat razmalavali ŭ ich tvary.
«My žyviom u XXI stahodździ, a kanstytucyi, u jakoj havorycca, što refierendum niezakonny, užo 40 hadoŭ. Časy mianiajucca», - skazała ahienctvu Frans pres 25-hadovaja ŭdzielnica akcyi Daura Albierch.
«Čas idzie, i ludziam stanovicca ŭsio bolš zrazumieła, što zastavacca ŭ składzie Ispanii nie ŭ našych intaresach», — kaža 20-hadovaja ŭdzielnica akcyi Hanna Kamiełas.
Kolerami katałonskaha ściaha ŭpryhožyli znakamity chram Sahrada Familija. Fota Getty
Mer Barsiełony Ada Kałau u cełym padtrymlivaje refierendum, ale zapatrabavała ŭ Katałonskaha parłamienta zabiaśpiečyć udzieł u im usich žycharoŭ aŭtanomnaj pravincyi.
Refierendum ab niezaležnaści ŭłady Katałonii majuć namier pravieści 1 kastryčnika. Pytańnie, jakoje jany źbirajucca vynieści na refierendum, hučyć tak: «Ci chočacie vy, kab Katałonija stała niezaležnaj dziaržavaj z respublikanskaj formaj praŭleńnia?»
Dla taho, kab było pryznana, što hałasavańnie adbyłosia, minimalnaj jaŭki nie praduhledžana. U vypadku pieramohi prychilnikaŭ niezaležnaści ŭłady Katałonii abiacajuć praz 48 hadzin paśla abjavy vynikaŭ pačać praces stvareńnia niezaležnaj dziaržavy.
Čytajcie taksama:
Sioleta ŭ Jeŭropie moža źjavicca novaja dziaržava. Jakoj jana budzie?
