Iryna Baryšnikava, Alena Anisim. Fota belta.by, svaboda.org.
Pazicyju MARHa vyrazna akreśliła načalnik upraŭleńnia abarony pravoŭ spažyŭcoŭ i kantrolu za rekłamaj Iryna Baryšnikava. Jana i raniej aktyŭna prasoŭvała ideju pakinuć farmuloŭku «na biełaruskaj abo ruskaj movach».
Čynoŭnica Iryna Baryšnikava prapanuje pisać na tavarach infarmacyju pa-biełarusku ABO pa-rusku. Heta pryviadzie da likvidacyi biełaruskaj movy na tavarach.
«Maŭlaŭ, što abaviazvaje Mytny kodeks, što heta zaminaje vychodzić na rasijski rynak, na rynak JEAES…, — kamientuje Alena Anisim. — Ja tłumaču, što kali my dadajom «i», to heta ničomu nie supiarečyć. Prapisana, što pavinna vykarystoŭvacca ruskaja mova i inšaja dziaržaŭnaja mova krainy, kali heta nie supiarečyć dziaržaŭnamu zakanadaŭstvu. Takim čynam, nijakich arhumientaŭ u ich niama. Pry hetym jany ŭčora zajavili, što ŭ hetym pytańni treba raicca ź jurystami. Ja kažu: «Prabačcie, a vy što, nie jurysty? Jurysty. U nas dziejničaje Zakon ab movach z farmuloŭkaj «i (abo)» užo bolš za 20 hadoŭ. Jakija jašče dadatkovyja kansultacyi?» Ja prama skazała, što heta nie pravavaja pazicyja, a subjektyŭnaja. Pryčym jana abmiažoŭvaje prava vytvorcaŭ na vykarystańnie dziaržaŭnych moŭ».
Spadarynia Alena dadaje, što farmuloŭka, za zachavańnie jakoj jana ciapier vystupaje, nie idealnaja, pakolki vykarystańnie biełaruskaj movy musić być abaviazkovym.
«Voś u hetym naša zadača, bo ciapier my bačym pramoje ihnaravańnie biełaruskimi vytvorcami biełaruskaj movy navat na terytoryi Biełarusi. My chočam źmianić hetuju situacyju, tamu idziom na kampramis. Niachaj budzie «i (abo)», ale va ŭsiakim razie heta paspryjaje tamu, što mnohija vytvorcy, mnohija biznesoŭcy buduć mieć prava zakonna karystacca abiedźviuma dziaržaŭnymi movami. Naša zadača nie supraćpastaŭlać, a znachodzić bolš prymalnyja formy vykarystańnia biełaruskaj movy i ŭvodzić heta ŭ zakanadaŭstva. Davajcie karystacca abiedźviuma movami, a nie abmiažoŭvać prava biełaruskaj, — davodzić Alena Anisim. — Jak praviła, biznesoŭcy ŭ spadziavańni vyjści na rynak Rasii ci na rynak JEAES abirajuć ruskuju movu, bo jany miarkujuć, što heta im dapamoža. A pra toje, što jany ihnarujuć pravy spažyŭcoŭ unutry Biełarusi, mała chto dumaje».
Deputat tłumačyć, što ciapier jaje zadača — pryciahnuć uvahu da hetaha pytańnia i zrabić usio, što mahčyma, kab zabiaśpiečyć pravy biełaruskamoŭnych spažyŭcoŭ.
«Farmuloŭka «na biełaruskaj ABO ruskaj movach» abaviazvaje vytvorcaŭ vykarystoŭvać tolki adnu movu. Mienavita abaviazvaje, a nie daje prava. Zvažajučy na toje, što ruskamoŭnaja prastora siońnia bolš pašyranaja, jość vialikaja imaviernaść taho, što vytvorcy prosta buduć vymušanyja abrać ruskuju movu. U takim vyhladzie farmuloŭka jašče bolš pahražaje źniščyć biełaruskamoŭnuju prastoru ŭ śfiery biznesu i tym samym dyskryminavać biełaruskamoŭnych spažyŭcoŭ», — padsumavała Alena Anisim.
Jana zaznačyła, što mnohija deputaty padtrymlivajuć jaje pazicyju ŭ dačynieńni da dziaržaŭnaj biełaruskaj movy jak u hetym abmierkavańni, tak i ŭ cełym.
Čytajcie taksama:
Ihar Słučak: Anisim vystupaje zaadno z Marzalukom zamiest taho, kab zamacavać vykarystańnie i biełaruskaj, i ruskaj movy na tavarach
