U Azii źjaviŭsia štam «supiermalaryi», ustojlivy da najbolš papularnych preparataŭ. Navukovaja praca ab hetym apublikavanaja ŭ časopisie The Lancet Infectious Diseases, koratka ab situacyi raspaviadaje vydańnie IFLScience.
Najprosty parazit Plasmodium falciparum vyklikaje malaryju ŭ ludziej. Niadaŭna źjaviŭsia štam, ustojlivy da preparataŭ hrupy artemizininu. Hetyja preparaty majuć najbolš chutkaje dziejańnie suprać malaryi, vyklikanaj parazitam. Chvaroba, vyklikanaja ŭstojlivymi parazitami, usio jašče paddajecca lačeńniu, adnak jano zajmaje bolš času.
Na dadzieny momant vypadki zaražeńnia «supiermalaryjaj» zafiksavali ŭ piaci krainach: Kambodžy, Łaosie, Tajłandzie, Vjetnamie i Mjanmie. U rajonie miažy pamiž Tajłandam i Kambodžaj raźviłasia forma parazita, ustojlivaja amal da ŭsich sposabaŭ lačeńnia.
Ličycca, što ŭstojlivaść raźvivajecca z-za mnostva faktaraŭ, siarod jakich — pacyjenty, jakija nie da kanca pjuć kurs antybijotykaŭ, nieadekvatnyja prahramy lačeńnia i šyrokaja dastupnaść preparata na pryłaŭkach.
«Kala 700 000 čałaviek u hod pamirajuć ad lekava-ŭstojlivych infiekcyj, uklučajučy malaryju. Kali ničoha nie budzie zroblena, hetaja kolkaść moža pavialičycca da miljonaŭ čałaviek štohod da 2050 hodzie», — skazaŭ Majkł Ču z dabračynnaha fondu Wellcome Trust.
