Viadoma, pieraličyć absalutna ŭsich kazurak u krainie niemahčyma. Ale ŭ ekołahaŭ jość svaje mietady. Jany raźmiaščajuć śpiecyjalnyja pastki na terytoryjach zapaviednikaŭ i padličvajuć kolkaść nasiakomych, jakija traplajuć u tyja pastki za peŭny čas. Paraŭnoŭvajučy kožny taki «ułoŭ», možna zrazumieć, jak źmianiajecca vidavaja raznastajnaść i kolkaść nasiakomych ź ciaham času.
Tak vyhladaje pastka dla adłovu nasiakomych
Hetyja nazirańni, jak raspaviadaje Kaspar Chałman, supracoŭnik univiersiteta Radbuda ŭ Niamieččynie, malujuć katastrafičnuju karcinu, jakaja skłałasia ŭ apošnija hady. Pa padlikach ekołahaŭ, kolkaść i bijamasa nasiakomych skaraciłasia prykładna na 75% i 82% adpaviedna va ŭsich šaścidziesiaci zapaviednikach, niahledziačy na vielizarnyja adroźnieńni ŭ klimacie, fłory i faŭnie pamiž imi.
Kankretnyja ličby takija: kali ŭ 1990 hodzie ŭ pastki kožny dzień traplała prykładna 10 hramaŭ nasiakomych, to siońnia hety pakazčyk pamienšyŭsia da 2 hramaŭ na dzień. Takoje rezkaje padzieńnie, jak adznačajuć daśledčyki, moža pryvieści da abvalvańnia ŭsich ekasistem — jano zakranuła nie tolki roznych drapiežnych i parazityčnych nasiakomych, ale i apylalnikaŭ, jakija, jak viadoma, adyhryvajuć nadzvyčaj važnuju rolu ŭ sielskaj haspadarcy.
Pryčyny tajamničaha źniknieńnia takoj vialikaj kolkaści nasiakomych pakul nie vyjaŭlenyja. Adno ź mierkavańniaŭ ekołahaŭ — chutkaje raźvićcio sielskaj haspadarki, ale nad dakładnymi vynikami daśledavańnia navukoŭcy jašče pracujuć.
