Incydent adbyŭsia 26 kastryčnika ŭ 23.00.
— Złačynstva ździejśniŭ 30-hadovy žychar ahraharadka Stołpnia. Milicejski post ustanoŭleny ŭ ahraharadku ŭ suviazi z prafiłaktyčnymi mierapryjemstvami. Supracoŭniki RAUS praviarali prajazdžajučyja aŭtamabili. Baćka hetaha čałavieka paskardziŭsia synu na toje, što jamu nadakučyła pravierkami milicyja. Małady mužčyna vypiŭ i vyrašyŭ razabracca z pravaachoŭnikami, raspavioŭ «Svabodnamu słovu» pieršy namieśnik načalnika Rahačoŭskaha RAUS Viačasłaŭ Lichałat.
Mužčyna prychapiŭ z saboj plašku ź bienzinam i vintoŭku Mosina. Pieršym u chod pajšło haručaje: viaskoviec chacieŭ padpalić post, ale plaška nie dalacieła da celi i zaharełasia za 15 mietraŭ ad jaje. Milicyjant ubačyŭ połymia i vyjšaŭ na vulicu. Raptam pačuŭsia streł: žychar Stołpni stralaŭ ź vintoŭki. Tady supracoŭnik RAUS dastaŭ pistalet, pieradziornuŭ zatvor. Pačuŭšy charakterny huk, złamyśnik jašče raz streliŭ i ŭciok.
Praź niekatory čas byŭ zatrymany i ŭziaty pad vartu. Svaje dziejańni jon patłumačyŭ tym, što prosta chacieŭ napałochać pravaachoŭnikaŭ. Pry vobšuku ŭ domie mužčyny znajšli zbroju, patrony i inšyja bojeprypasy.
U dačynieńni da zatrymanaha zaviedziena kryminalnaja sprava pa častcy 3 artykuła 339 Kryminalnaha kodeksa «Chulihanstva», zhodna ź jakoj jamu pahražaje da dziesiaci hadoŭ pazbaŭleńnia voli.
