U sudzie Partyzanskaha rajona Minska razhladajuć spravu ab hučnym DTZ. Mužčyna biez pravoŭ naśmierć źbiŭ na piešachodnym pierachodzie maładuju žančynu ź dziciom.
Avaryja adbyłasia ŭ pačatku maja na vulicy Sołtysa ŭ Minsku. BMV jechaŭ z boku vulicy Vaŭpšasava ŭ napramku vulicy Pierachodnaj.
Pierad piešachodnym pierachodam mašynu zaniesła i raźviarnuła. U vyniku aŭtamabil źbiŭ na pierachodzie 33-hadovuju žančynu, u jakoj na rukach była 3-hadovaja dačka, a potym urezaŭsia ŭ tralejbus. Žančyna zahinuła na miescy zdareńnia, dzicia na chutkaj pavieźli ŭ balnicu. Akramia hetaha, try pasažyry ŭ BMW atrymali traŭmy roznaj stupieni ciažkaści. Sam kiroŭca byŭ pjany. Akramia taho, pravoŭ kiravańnia aŭtamabilem jon nie mieŭ i nikoli ich nie atrymlivaŭ.
Ciapier toj samy kiroŭca na łavie padsudnych. Jaho zavuć Ihar Sokał, jamu 30 hadoŭ. Sokał rodam ź Pinska, ale žyŭ u Minsku. Byŭ raźviedzieny, nidzie nie pracavaŭ.
Raniej Sokał užo mieŭ sudzimaści: u 2008 hodzie jon atrymaŭ 7 hadoŭ pazbaŭleńnia voli za zhvałtavańnie. U 2015 — paŭhoda pazbaŭleńnia voli za parušeńnie praviłaŭ previentyŭnaha nahladu.
Ciapier Sokała sudziać za pjanaje DTZ, jakoje paciahnuła śmierć čałavieka. Jamu pahražaje da 7 hadoŭ pazbaŭleńnia voli.
Vinu svaju Sokał pryznaŭ častkova.
«Ja byŭ za styrnom, i mašyna akazałasia ŭ zanosie, ja źbiŭ čałavieka. Ale ździejśniŭ nie ŭsie pieraličanyja prakuroram parušeńni PDR», — skazaŭ Ihar Sokał.
Na sudzie Sokał admoviŭsia davać pakazańni.
Paciarpieły — muž zahinułaj žančyny — paprasiŭ sud spahnać z Sokała kampiensacyju za maralnuju škodu — 30 tysiač na svaju karyść, 40 tysiač — dačce. I jašče 200 rubloŭ za pasłuhi jurysta.
U mašynie ŭ tuju noč byŭ sam Ihar Sokał, jaho siabar i baćka siabra.
Pra padrabiaznaści raspavioŭ baćka siabra. Kampanija jechała ŭ kramu pa ałkahol. Sam mužčyna «vypivaŭ ciaham dnia», ci piŭ Sokał — nieviadoma, śćviardžaje śviedka, ale nibyta toj vyhladaŭ ćviarozym.
Paśla DTZ mužčynu vykinuła praz raźbitaje škło mašyny na bahažnik, paśla jon vylecieŭ na hazon. Złamaŭ rebry, chrybiet, kaža, u prytomnaść pryjšoŭ na dziasiatyja sutki. Ale pretenzij da Sokała nie maje.
«Jak pakarać jaho? Jak vyrašyć sud», — skazaŭ śviedka.
