Hety čałaviek kiravaŭ TAA «AlfaTrajpł», TAA «TrajpłHrup», TAA «SSSR» i jašče šeraham kampanij. Ciapier 26-hadovamu sisadminu ź Minska, jaki na jaho pracavaŭ, pahražaje da 10 hadoŭ źniavoleńnia.
U kancy śniežnia 2016 hoda minčuk Mikita Kižłaj ubačyŭ abjavu, što niechta IP Kaviecki šukaje sisadmina dla pracy z sajtami. Zarobak abiacali nievialiki — 100 rubloŭ, ale Kižłaj zacikaviŭsia, bo padpracoŭka nie lišniaja.
Kižłaj schadziŭ na sumoŭje. Zdajecca, pracadaŭca i rabotnik zadavolili adzin adnaho.
Mikita Kižłaj.
Damovilisia, što Mikita musić zajmacca redahavańniem užo isnujučych sajtaŭ 080.by, breneran.by, kedroff.by, xalva.by i taksama stvoryć dva novyja sajty. Zamaŭlaŭ pracu 39-hadovy Stanisłaŭ Kaviecki.
«3 studzienia 2017 h. pamiž mnoj i Kavieckim Stanisłavam Balasłavavičam była zaklučana damova padradu, pieršyja hrošy ja atrymaŭ u siaredzinie studzienia 2017 hoda ŭ pamiery 99 rubloŭ 94 kapiejki — heta była apłata za studzień», — uzhadvaje Kižłaj.
Paśla ŭ lutym zaklučyli jašče adnu damovu padradu, jaje Kaviecki taksama apłaciŭ.
Zatym Kižłaj praciahvaŭ zajmacca sajtami, ad Kavieckaha pastupali zadańni, ale ž damovy bolš nie padpisvalisia. Za sakavik i krasavik hrošaj Kižłaju, pa jaho słovach, taksama nie dali. «Na pytańni Stanisłaŭ Kaviecki adkazvaŭ, što zaniaty na niejkaj budoŭli, nie maje času, ale damovy nibyta ŭžo ŭ buchhałtara i, jak tolki znojdziecca volny dzień, usio budzie padpisana i apłačana», — śćviardžaje Mikita Kižłaj.
Tak ciahnułasia da červienia. U volny čas Kižłaj pahartaŭ Hramadzianski kodeks i zacikaviŭsia artykułam 666, zhodna ź jakim padradčyk, kali pracadaŭca nie płacić, moža prytrymać vyniki pracy i majomaść zakazčyka, jakoj karystajecca. Voś Kižłaj i vyrašyŭ «prytrymać» sajty Kavieckaha. Mikita źmianiŭ paroli administratara i paviesiŭ na startavyja staronki sajtaŭ zahłušku z nadpisam: «Sajt časova niedastupny, zapłacicie sistemnamu administrataru».
Paśla Kižłaj pačaŭ čakać zvankoŭ ad zakazčyka. Ale ich nie było. Pa słovach Kižłaja jon sprabavaŭ sam źviazacca z Kavieckim, ale biezvynikova. Tady Kižłaj uvohule zabłakavaŭ sajty, zrabiŭšy tak, kab jany nie zahružalisia.
Ale ž u kancy červienia sajty adnavili pracu. Chutčej za ŭsio, Kaviecki zrabiŭ heta praz chostara. Razzłavany Kižłaj tady całkam vydaliŭ sajty z chostynhu. Reziervovyja kopii zachavaŭ na svaim žorstkim dysku.
Paśla hetaha 4 lipienia Kaviecki ŭsio ž vyjšaŭ na suviaź. Jon paabiacaŭ, što padpiša damovy za try viasnovyja miesiacy i zapłacić 300 rubloŭ. Z Kižłaja jon paprasiŭ raśpisku, što tamu addali hrošy, toj pahadziŭsia.
«Ja napisaŭ raśpisku, adpraviŭ jaje Kavieckamu S.B. pa elektronnaj pošcie i 24 lipienia 2017 hodu pajechaŭ da jaho ŭ ofis (jon mnie patelefanavaŭ i zaprasiŭ mianie). Płanavaŭ atrymać hrošy za svaju pracu. Adnak zamiest vypłaty ŭ ofisie mianie čakali supracoŭniki milicyi, jakija zaprasili mianie ŭ Maskoŭskaje RUUS Minska», — raspaviadaje Mikita Kižłaj.
Pa jaho słovach, Kaviecki kazaŭ milicyi, što Kižłaj nie pracuje na jaho, ale ź nieviadomaj pryčyny łamaje sajty i patrabuje hrošaj. Paśla razmovy ź milicyjaj Kižłaja adpuścili.
Mikita źbirajecca pisać na svajho zakazčyka zajavu pra paklop i prysvajeńnie intelektualnaj majomaści. Ale pakul što na samoha Kižłaja raspačata kryminalnaja sprava. Jon na voli, ale pad padpiskaj. Jaho vinavaciać u niesankcyjanavanym dostupie da kampjutarnaj infarmacyi z karyślivych pryčyn, u kampjutarnym sabatažy. Maksimalnaje pakarańnie pa apošniamu artykułu KK — 10 hadoŭ.
Sam Kižłaj vinavatym siabie nie ličyć.
«Ja nie vymahaŭ hrošy, a chacieŭ atrymać zaroblenaje, nie bolš. Liču, što dziejničaju zakonna i kirujusia pałažeńniami Hramadzianskaha kodeksa Respubliki Biełaruś. U svaju čarhu, Kaviecki padmanuŭ mianie», — upeŭnieny Kižłaj.
Niaŭžo ž toj pracadaŭca sapraŭdy nastolki niesumlenny? «Naša Niva» pacikaviłasia asobaj Stanisłava Kavieckaha.
Stanisłaŭ Balasłavavič Kaviecki mieŭ dačynieńnie da cełaha šerahu firmaŭ. Pryčym, usie z hučnymi nazvami: TAA «Śpiecvajenkantrakt», TAA «AlfaTrajpł», TAA «TrajpłHrup», TNK Alfa. Niahledziačy na nazvy, jak da čyžoŭskaha «Trajpła», tak i da vajennych kantraktaŭ jany dačynieńnia nie majuć, a zajmajucca adnym i tym ža — prodažam abstalavańnia dla saŭn, prodažam katłoŭ, piečaŭ, altanak i pryładaŭ dla barbiekiu.
Cikava, što roznyja ahrehatary vodhukaŭ ab pracadaŭcach adrazu vydajuć proźvišča Kavieckaha. Vodhukaŭ mała, ale ŭsie jany vyklučna niehatyŭnyja. Byłyja supracoŭniki skardziacca na niavypłaty hrošaj i padman z boku byłoha načalnika.
Ale šmat čaho pra Kavieckaha mohuć raskazać nie tolki jaho byłyja supracoŭniki. Dobra pamiataje Stanisłava Balasłavaviča i kiraŭnik adnaho ź minskich STA Andrej.
«Jon padavaŭ na nas u sud u 2015 hodzie. Historyja była fiejeryčnaja, u 2014 Kaviecki pryhnaŭ da nas staruju mašynu z kučaj prablem, kab adramantavać. I źnik. Mašyna jak stajała, tak i stajała, my vyrašyli za jaje nie bracca, kali haspadar nie prychodzić. A praz hod jon abjaviŭsia, zajaviŭ, što my ciapier musim spłacić jamu hrošaj za tuju mašynu i kupić novaje aŭto, — uzhadvaje Andrej. — Kaviecki pajšoŭ u sud, ale prajhraŭ. Paśla abskardžvaŭ rašeńnie, ale sud byŭ na našym baku».
Akramia taho, Andrej padčas suda vyśvietliŭ cikavy momant. Dyrektaram adnoj ź firmaŭ Kavieckaha pracavaŭ čałaviek, znajomy Andreju.
«Chłopca zvali Alaksandr H., my jaho dobra viedali. Jon prychodziŭ časam da nas na STA, bo žyŭ niezdalok, my jaho padkarmlivali, addavali staroje adzieńnie, jon časam u nas prybiraŭ. A paśla vyśvietliłasia, što jon dyrektar niejkaha TAA u Kavieckaha, — raskazaŭ «Našaj Nivie» Andrej. — Sam toj Alaksandr byŭ, kaniečnie, zadavoleny, raskazvaŭ nam, što Kaviecki jamu «śnikiersy» daje».
«Naša Niva» źviazałasia ź siamjoj Alaksandra. Jaho brat paćvierdziŭ — u Alaksandra sapraŭdy prablemy, ciapier vyrašajecca pytańnie ab atrymańni im 2 hrupy invalidnaści i navat ab pazbaŭleńni jaho dziejazdolnaści.
«Niejkija sudy kaliści moža i byli, ja nie pamiataju. Pra dyrektarstva skazać ničoha nie mahu — ja tady nie viedaŭ dzie i što robić Alaksandr», — paviedamiŭ brat.
A sioleta Kaviecki sudzicca ź minskaj budaŭničaj kampanijaj «DarimStroj». «Jon pastaviŭ nam materyjały dla łaźni. U damovie była prapisana dzikaja pienia — 1% za dzień — ale my nie źviarnuli ŭvahi,
bo płanavali addać hrošy chutka. Ale ŭsio vyjšła zusim nie tak, — raskazali «Našaj Nivie» ŭ kampanii. — Da jakaści materyjałaŭ byli pytańni. My chacieli ich zamianić, ale Kaviecki źnik. U vyniku, my zamianili materyjały za svoj košt, ale nie zmahli vyrašyć pytańnie z Kavieckim nakont materyjałaŭ i hrošaj, bo ź im niemahčyma było źviazacca.
Sam ža Kaviecki abjaviŭsia tolki praź miesiacaŭ 5 z paviedamleńniem, što padaŭ u sud, kab spahnać pieniu».
Kiraŭnictva AAT «DarimStroj» zapeŭnivaje, što nie suprać addać Kavieckamu hrošy za materyjały, i prapanavała jamu heta ŭ sudzie, ale jon nastojvaje, što choča pieniu. Suma siońnia — kala $5 tysiač i praciahvaje raści.
Ale i heta jašče nie ŭsio. U 2016 hodzie ŭ Stanisłava Kavieckaha była jašče adna sprava: pra ŭchileńnie ad spłaty padatkaŭ.
Samoha Kavieckaha znajści niaprosta. Jaho asabisty telefon adklučany.
Numar AAT «Śpiecvajenkantrakt» nie isnuje. U kampanii «AlfaTrajpł» słuchaŭku padniaŭ mužčyna, jaki pradstaviŭsia Siamionam. Jon admoviŭsia nazyvać svaju pasadu i paprasiŭ bolš nie zvanić, bo «Kaviecki tut bolš nie pracuje».
Tym časam biehły pošuk vydaje ažno 3 kampanii, jakija ŭ rozny čas byli zarehistravanyja ŭ Smalensku. Adna pad nazvaj TAA «SSSR» zajmałasia vytvorčaściu chimičnych rečyvaŭ, druhaja — TAA «Trajpł» — budaŭničymi pracami. Treciaja, «Intieko» — i budaŭničami pracami, i handlem budmateryjałami. Va ŭsich zasnavalnikam paznačany niechta Stanisłaŭ Balasłavavič Kaviecki.
Praŭda, praź dzień paśla zvankoŭ na «AlfaTrajpł» Kaviecki sam pazvaniŭ u «Našu Nivu» — čamuści sa schavanaha numara.
Kaviecki śćviardžaje, što Kižłaj chłus.
«Sa śniežnia pa sakavik Kižłaj pracavaŭ pa damovie padradu. Rabiŭ nam sajt try miesiacy. Atrymlivaŭ pa 100 rubloŭ u miesiac. Viasnoj 2017 hoda my razarvali ź im damovu, bo jon nie paśpiavaŭ rabić toje, što treba. Ź viasny jon ničoha nie rabiŭ, a letam zabłakavaŭ 10 našych sajtaŭ — paralizavaŭ usiu pracu, — kaža Kaviecki. — I prosta na ekranie napisaŭ: ja chaču hrošy, płacicie hrošy, ja adnaŭlu sajty. My zaprasili jaho ŭ ofis, jon skazaŭ, što bolš tak rabić nie budzie. My pajšli ź im u bank, zapłacili jašče jamu hrošaj (100 rubloŭ), jon napisaŭ raśpisku. Praz tydzień zabłakavaŭ jašče dva sajty — jašče zachacieŭ hrošaj. I što nam było rabić?»
Pa słovach Kavieckaha, siońnia ŭsie jaho kampanii, ani ŭ Minsku, ani ŭ Smalensku, nie pracujuć. «AlfaTrajpł» finansava-haspadarčaj dziejnaści nie viadzie (praŭda, pry zvankach žurnalista ŭ «AlfaTrajpł» tajamničy Siamion nastojliva pytaŭsia, što chacieli b kupić).
Siońnia Stanisłaŭ Kaviecki, pa jaho słovach, adzinoki ipešnik, jaki pradaje aciaplalnaje abstalavańnie. Ale dalej razmova ź im nabyła siurealistyčnaje adcieńnie.
Jaki ŭ IP Kavieckaha siońnia sajt? Jak znajści, kali treba budzie nabyć abstalavańnie?
«Ja ni ab čym davać spravazdaču nie mahu, nie maju prava, praŭda?»
Ci była ŭ samoha Kavieckaha sudovaja sprava za ŭchileńnie ad spłaty padatkaŭ?
«Niezrazumiełaja infarmacyja. Niedakładnaja. Kižłaj vas padmanvaje».
Ci moža Kaviecki raskazać padrabiaźniej pra sud z STA?
«Ja tak razumieju, u vas inšych spravaŭ niama, znajšli śmiećcievuju jamu, jakaja nazyvajecca Mikita Kižłaj? Kali ŭ čałavieka haŭna šmat, bolš čym hałava, hetaje haŭno ciapier vyłazić. Treba napisać pra Kižłaja, što jamu pahražaje da piaci hadoŭ!»
A što z sudom z kampanijaj «DarimStroj»?
«10 sudovych spravaŭ vyjhraŭ IP Kaviecki. Zrazumieła heta? Daŭžnik nie płacić hrošy, što tut niezrazumiełaha».
A chto toj Alaksandr H.? Ci byŭ jon dyrektaram čahości?
«Kali haŭna šmat u čałavieka, jon budzie dastavać hetaje haŭno i sprabavać abmazać im inšaha čałavieka, kab tamu było horš». «Užo balić hałava. Heta nieprafiesijna. Jak tolki źjavicca niejkaje haŭno, u luboj haziecie — ja praź dzień budu ŭ Redakcyi!» — pahražaŭ nam pa telefonie Kaviecki.
* * *
Uvohule, da mnohich našych surazmoŭcaŭ u hetaj historyi jość pytańni.
Što Mikitu Kižłaju zabaraniała prakansultavacca ź jurystami ci pravaabaroncami pierad błakavańniem tych sajtaŭ?
Ale majem toje, što majem. A kropku ŭ hetaj historyi pastavić sud.
