Zdymajučy siužet la miesca stalinskich rasstrełaŭ u Kurapatach, karespandenty zaŭvažyli, što na terytoryi kaliści zakinutaha kompleksu viaducca aktyŭnyja raboty. Achoŭnik, jaki adrazu ž padyšoŭ da zdymačnaj hrupy «Biełsata», raspavioŭ: abjekt budzie kančatkova zdadzieny ŭžo ŭ studzieni.
Rabočyja abkładajuć cehłaj kominy tak zvanaha «Bulbaš-chołu». Fota: Iryna Arachoŭskaja
Kab daviedacca, ci sapraŭdy kompleks adkryjecca ŭ nastupnym miesiacy, žurnalisty pasprabavali źviazacca ź jaho ŭłaśnikam.
Vosieńniu 2012 hoda ŭ pašparcie abjektu ŭ jakaści zakazčyka budoŭli fihuravała kampanija «BiełRestInviest», a internet-staronka budučaha «Bulbaš-chołła» źjaviłasia na sajcie chołdynhu «Naša restarannaja hrupa» (TAA «Biełnavateks hrup»).
«Naša restarannaja hrupa» vałodaje šeraham fiešeniebielnych restaranaŭ u Minsku. Adnak pra ŭłaśnikaŭ hetaha biźniesu amal ničoha nie viadoma. Adzinaja zhadka pra dyrektara «Biełnavateks hrup» Aleha Varabjova ŭ adkrytych krynicach — heta jaho karotki kamientar śpiecyjalizavanamu sajtu a1development.by nakont asablivaściaŭ restaratarskaj spravy.
Tak zvany «Bulbaš-choł» siońnia. Fota: Iryna Arachoŭskaja
Žurnalisty belsat.eu patelefanavali ŭ «Biełnavateks hrup», ale atrymali tam supiarečlivyja adkazy na svaje pytańni. Spačatku pradstaŭnik kampanii paćvierdziła, što kompleks na 51-m kiłamietry MKAD kala Kurapat naležyć «Biełnavateks hrup».
«Ale nazva tam inšaja. «Bulbaš-choł» — heta ŚMI prydumali», — adznačyła žančyna i paprasiła patelefanavać paźniej, kali pryjdzie mieniedžar pa markietynhu.
Kali ž belsat.eu patelefanuje ŭ nastupny raz, to ŭžo inšaja pradstaŭnica adnaznačna zajavić, što «Biełnavateks hrup» nie maje nijakaha dačynieńnia da hetak zvanaha «Bulbaš-chołu». Jana taksama admoviłasia pieraklučyć žurnalista na kiraŭnictva kampanii.
Cikava, što «BiełRestInviest» i «Biełnavateks hrup» zarehistravanyja ŭ adnym budynku: Minsk, zavułak Kazłova, 5A. Adroźnivajucca tolki kabiniety. Abiedźvie kampanii taksama fihurujuć u adnym z dakumientaŭ Ministerstva antymanapolnaha rehulavańnia i handlu ŭ jakaści arhanizataraŭ rekłamnaj hulni. Možna dapuścić, što hetyja kampanii ščylna źviazanyja pamiž saboj, adnak dakładny farmat ich suviaziaŭ zastajecca niezrazumiełym.
Tak zvany «Bulbaš-choł» siońnia. Fota: Iryna Arachoŭskaja
Žurnalisty patelefanavali i ŭ «BiełRestInviest», kab udakładnić, ci pravilnaja infarmacyja pra adkryćcio kompleksu ŭ studzieni. Nabraŭšy pryvatny numar Andreja Jarmolenkava, zapytali ŭ jaho pra akaličnaści.
«Tak, ja ŭłaśnik hetaha abjekta na 51-m kiłamietry. Ale ja zdaju jaho ŭ arendu pradpryjemstvu TAA «Aniśbieł». Ja ciapier uvohule zajmajusia tolki tym, što svaje abjekty zdaju ŭ arendu. A ci płanujuć jany adkrycca ŭ studzieni — nie viedaju, heta ŭžo nie maja sprava», — zajaviŭ hiendyrektar kampanii Jarmolenkaŭ.
Jon dadaŭ, što «pradstaŭlaje zamiežnaha inviestara», jaki ŭkłaŭ hrošy ŭ «Bulbaš-choł», ale krainu pachodžańnia inviestycyj nie nazvaŭ. Pavodle Jarmolenkava, paśla skandału vakoł budaŭnictva kompleksu, zamiežnyja biźniesoŭcy «bolš svaje hrošy ŭ hetaje miesca ŭkładvać nie chočuć».
«Zmarnavali 5 hadoŭ… Harantam u pieramovach vystupała dziaržava, ja pradstaŭlaŭ intaresy zamiežnikaŭ. Nu kali jany pryjechali i ŭkłali hrošy ŭ biźnies, to nie buduć ža jany kałupacca ŭ hetaj ziamli! Viedajecie, tam ničoha nie było ŭvohule da vajny, zvyčajnaja bahna! Jość histaryčnyja dakumienty», — raschvalavaŭsia hiendyrektar.
Kamientujučy niadaŭniuju abaronu Kurapataŭ — łahier aktyvistaŭ, jakija ŭ lutym supraćstajali budaŭnictvu inšaha kompleksu praz darohu, Jarmolenkaŭ skazaŭ:
«Niejkija idyjoty katalisia pa ziamli… Kryžy pobač z kompleksam stajać? Dyk ich ža niezakonna tam pastavili».
Kiraŭnik TAA «Aniśbieł» zajaviła žurnalistam belsat.eu, što ničoha nie čuła pra niejki abjekt na 51-m km MKAD i jany ŭvohule ničoha nie arandujuć. «Aniśbieł» vałodaje maleńkim baram na stancyi mietro «Uschod» u Minsku i kramaj sadaviny niepadalok — maštaby, nieparaŭnalnyja z «Bulbaš-chołam».
Tak zvany «Bulbaš-choł» siońnia. Fota: Iryna Arachoŭskaja
***
Skandał vakoł budaŭnictva «Bulbaš-chołu» raspačaŭsia vosieńniu 2012 hoda, kali hramadskija aktyvisty daviedalisia pra toje, što restaranny kompleks źjavicca pobač z kurapackimi kryžami. Pradstaŭniki hramadskaści śćviardžali, što zabudoŭščyk parušyŭ zakanadaŭstva: budynki byli ŭźviedzieny na terytoryi achoŭnaj zony Kurapataŭ. Z hetym pahadziłasia Hienieralnaja prakuratura Biełarusi: naprykancy 2012 hoda ŭ Mienabłvykankam było nakiravanaje pradstaŭleńnie ab «likvidacyi parušeńniaŭ zakanadaŭstva ab achovie historyka-kulturnaj spadčyna». Budoŭlu zakansiervavali.
A ŭ 2013—2014 hh. kamisija Ministerstva kultury pryniała šerah rašeńniaŭ ab skaračeńni miežaŭ achoŭnaj zony Kurapat — faktyčna miežy byli skarektavanyja akurat pad «Bulbaš-choł» (zabudova była vyviedziena z achoŭnaj zony). U ŚMI niekalki razoŭ źjaŭlałasia infarmacyja, što «Bulbaš-choł» (niachaj i pad inšaj nazvaj) chutka raspačnie svaju pracu, ale ni ŭ 2015-m, ni ŭ 2016-m hetaha nie adbyłosia.