Papa rymski Francišak zaklikaŭ žurnalistaŭ aśviatlać naviny spakojna, dakładna i poŭna, raskrytykavaŭšy raspaŭsiudžvańnie niedakładnaj infarmacyi i imknieńnie ŚMI da sensacyjnaści.
Jak paviedamlaje radyjo «Svaboda» sa spasyłkaj na radyjo Vatykana, pantyfik skazaŭ pra heta 16 śniežnia na sustrečy ź italjanskimi žurnalistami.
«Niama patreby ŭpadać u «kamunikacyjnyja hrachi»: dezinfarmacyju, adnabakovaje aśviatleńnie padziei, jakoje źmiaščaje prykmiety sensacyjnaści, abo paklop, vyciahvańnie starych, daŭno minułych rečaŭ. Heta vielmi ciažkija hrachi, jakija nanosiać škodu sercu žurnalista i inšym ludziam», — skazaŭ papa Francišak.
Pantyfik dadaŭ, što misija žurnalistaŭ — dakładnaje infarmavańnie, pradstaŭleńnie ludziam faktaŭ, maksymalna nabližanych da realnaści.
Francišak padkreśliŭ, što ŭ ciapierašni čas, kali panuje imknieńnie da chutkaj padačy infarmacyi i sensacyj, jakim nie chapaje dakładnaści i paŭnaty, vostra adčuvajecca patreba ŭ nadziejnaj infarmacyi, z pravieranymi dadzienymi i navinami, meta jakich nie zabaŭlać abo ŭražvać, a stvaryć u čytačoŭ krytyčny padychod, jaki dazvolić im zadavać pravilnyja pytańni i rabić abhruntavanyja vysnovy.
Niadaŭna adzin ź viadučych słoŭnikaŭ anhielskaj movy — Collins English Dictionary nazvaŭ vykazvańnie fake news (iłžyvaja navina) słovazłučeńniem hoda. Za apošni hod słovazłučeńnie fake news rezka nabyło papularnaść. Častata jaho vykarystańnia vyrasła bolš čym u try razy.
