Z Rasii iduć pastaŭki nafty abo naftapraduktaŭ u Paŭnočnuju Kareju nasupierak sankcyjam AAN, śćviardžaje Reuters sa spasyłkaj na krynicy ŭ jeŭrapiejskaj słužbie biaśpieki. Infarmacyja pra pastaŭki ŭ kastryčniku i listapadzie pakazvaje na toje, što ŭ praces kantrabandy z Rasii ŭ KNDR nibyta byli ŭklučanyja rasijskija karabli.
Pasiołak Słavianka ŭ Prymorskim krai, TASS
«Rasijskija karabli rabili pierapraŭku naftapraduktaŭ na paŭnočnakarejskija karabli ŭ niekalki vypadkach u hetym hodzie», — skazała krynica ahienctva ŭ słužbie biaśpieki. Druhaja krynica Reuters paviedamiła, što niama dokazaŭ taho, što rasijskija ŭłady ŭciahnutyja ŭ hetyja pastaŭki, choć fakt pierapraŭki paliva z karabla na karabiel jana paćvierdziła.
«Niama dokazaŭ, što jany padtrymlivajucca rasijskaj dziaržavaj, ale hetyja rasijskija karabli dajuć darohu žyćcia paŭnočnakarejcam», — skazała druhaja jeŭrapiejskaja krynica Reuters.
Krynicy zhadvali źviestki marskoj raźviedki i spadarožnikavyja zdymki rasijskich karabloŭ, jakija pracujuć u Cichim akijanie. MZS Rasii i Mytnaja słužba admovilisia ad kamientaroŭ.
Reuters nie ŭdałosia znajści niezaležnaje paćviardžeńnie taho, što takija pastaŭki byli, nieviadoma taksama kolki paliva mahło być pradadziena.
