Duchoŭny lidar Irana ajatała Ali Chamieniei abvinavaciŭ «vorahaŭ Isłamskaj respubliki» ŭ arhanizacyi masavych pratestnych akcyj, jakija praciahvajucca ŭ roznych haradach krainy ŭžo piać dzion.
«U apošnija dni vorahi Irana vykarystoŭvali roznyja instrumienty, u tym liku hrošy, zbroju, palityku i raźviedku, dla stvareńnia prablem u Isłamskaj respublicy», - zajaviŭ Chamieniei ŭ svaim pieršym zvarocie z nahody chvali pratestaŭ.
Pry hetym ajatała nie ŭdakładniŭ, kaho mienavita jon maje na ŭvazie pad słovam «vorahi»
Tym časam sakratar Najvyšejšaj rady nacyjanalnaj biaśpieki Irana Ali Šamchani zajaviŭ, što za arhanizacyjaj pratestaŭ stajać ułady ZŠA, Brytanii i Saudaŭskaj Aravii.
Masavyja pratestnyja akcyi ŭ Iranie praciahnulisia na praciahu ŭsiaho dnia 1 studzienia. Pavodle apošnich źviestak, u vyniku sutyknieńniaŭ demanstrantaŭ z palicyjaj zahinuŭ jak minimum 21 čałaviek.
Akcyi pratestu pačalisia ŭ čaćvier u horadzie Miešchiedzie. Pieršapačatkovaj metaj byŭ pratest suprać karupcyi i rostu cenaŭ, adnak pastupova jany nabyli bolš šyroki antyŭradavy charaktar.
