18 lutaha projduć miascovyja vybary. Niekatoryja pretendenty na mandaty pačali ŭžo źbirać podpisy (nieabchodna 150), inšyja ž buduć vyłučanyja ad partyj. «NN» vyrašyła pahladzieć, chto pradstaŭlaje samaje maładoje pakaleńnie, jakoje sioleta šturmuje Minski haradski saviet.
Natalla Navumava
(21 hod, śpiecyjalistka pa prodažach BPS-Śbierbank, Kupałaŭskaja vybarčaja akruha)
Natalla skončyła Instytut sacyjalna-humanitarnaj adukacyi BDEU. Jak vidać ź jaje sacyjalnych sietak, praktyku prachodziła ŭ «Biełaj Rusi», dzie prajaviła siabie «dyscyplinavanym, adkaznym i schilnym da chutkaha navučańnia» supracoŭnikam. Atrymała adznaku 10. Na jakija supołki padpisanaja Natalla? «Abiciel lasnoj viadźmarki», Luxurious Sexy Life™, «Fakty dla razumnych», «Ščaście ŭ isłamie» i inšyja.
Časam padpisvaje pasty svaim imiem, a nie robić reposty: «Čym bolš niebiaśpiečny źvier, tym bolšaja piaščota chavajecca ŭ jahonym drapiežnym sercy». Z repostaŭ jość takoje: «Kachańnie mužčyny vyražajecca ŭ troch formach: 1. Jon pryludna zajaŭlaje pra svaje pravy na vas; 2. Abaraniaje vas; 3. Zabiaśpiečvaje vas».
Pavieł Kataržeŭski
(22 hady, supracoŭnik «Burhier Kinh», Vaśniacoŭskaja vybarčaja akruha)
Pavieł — siabra partyi levych «Spraviadlivy śviet». Na fotazdymkach Ukantakcie bačna, što braŭ udzieł u ekałahičnych i anarchisckich arhanizacyjach. Šmat vykazvaje salidarnaść z aryštavanym anarchistam Źmitrom Palijenkam. Kataržynski nastupnymi słovami vinšavaŭ z 100-hodździem Kastryčnickaj revalucyi: «I nijakija Kieranskija, Puciny, Łukašenki, Nazarbajevy i im padobnyja nie zmohuć spynić koła historyi i śvitanak hramadstva svabody, spraviadlivaści i roŭnaści, jak by im hetaha ni chaciełasia».
Biełaruś nazyvaje «sumieśsiu cyrku, kancłahiera i psichbalnicy». Stalinskija mietady kiravańnia asudžaje. Žanaty z ukrainskaj kamunistkaj Valancinaj Sienčanka.
Michaił Zujevič
(22 hady, biespracoŭny, Malininskaja vybarčaja akruha)
Chłopiec ź cikavaj bijahrafijaj. Skončyŭ Minskuju suvoraŭskuju vučelniu, słužyŭ va Unutranych vojskach. Papracavaŭ aficyjantam. Na staroncy Michaiła Ukantakcie jość zdymak ź im i chłopcami z Unutranych vojskaŭ.
U partniorskich spasyłkach visić link na pablik Mikity Krasnakuckaha z «Moładzi BNF». Zujevič skłaŭ rejtynh samych niezvyčajnych admovaŭ padpisacca za jaho: «Ja tak nie hulaju», «Vy što, je…tyja?», «Doma nikoha niama!», «Vybačajcie, ale ja nie adamknu».
Jahor Makarevič
(21 hod, student Akademii kiravańnia pry prezidencie, Sierabranskaja vybarčaja akruha)
Vyhladaje, što chłopiec ad rańnich hadoŭ buduje sabie karjeru aficyjnaha palityka. Na avatarkach va ŭsich sacsietkach na vas hladzić surjozny tvar ź pieradvybarčych płakataŭ. Miesca pracy paznačanaje, jak «Moładzievaja pałata pry Minharvykankamie».
Fotazdymki Jahor vykładaje taksama ideałahična pravilnyja. Naprykład, jak Łukašenka hulaje ŭ chakiej na Kaladnym turniry. Albo sumiesnaje fota z byłym hałoŭnym ideołaham krainy Iharam Buzoŭskim. U padpiskach «BiełTA» i «Libieralny kłub». Ničoha prabiełaruskaj nakiravanaści niama. Styl u Makareviča vielmi aficyjny, nijakich volnaściaŭ ci žartaŭ jon sabie nie dazvalaje.
Piatro Markiełaŭ
(23 hady, biespracoŭny, Kupryjanaŭskaja vybarčaja akruha)
Markiełaŭ, mabyć, poŭnaja supraćlehłaść Makareviču. Heta adzin z kiraŭnikoŭ ruchu «Dzieja». Jon užo sprabavaŭ siabie ŭ elektaralnych kampanijach ź śviadoma trešavym prajektam «Kandydat Piatro». U vidosach bamžy zaklikali: «Čystata, krasata, hałasujcie za Piatra». Na toj momant Markiełaŭ byŭ studentam fizfaka BDU, ale za vuličnuju aktyŭnaść jaho vyklučyli z VNU.
Ciapier Markiełaŭ aktyŭničaje ŭ kampanii Legalize Belarus, jakaja vystupaje za lehalizacyju marychuany ŭ Biełarusi. Pierad 25 śniežnia praviali cełuju «kanaplanuju kaladu». Letaś Markiełava zatrymali i asudzili na 12 sutak padčas maršu niedarmajedaŭ, kali jon vioŭ strym z zatrymańniaŭ udzielnikaŭ.
Volha Ciesakova
(22 hady, mahistratura ekanamičnaha fakulteta BDU, Dziaržynskaja vybarčaja akruha)
Pierad hetym dziaŭčyna skončyła chimfak. Ciapier jana źjaŭlajecca staršynioj Kaardynacyjnaj rady BDU — heta taki, ŭ ideale, orhan studenckaha samakiravańnia. U biełaruskich ža ŭmovach jon mała na što ŭpłyvaje.
Kaža, što jaje meta ŭ tym, kab pra studentaŭ «skłałasia mierkavańnie, jak pra adekvatnych ludziej z aktyŭnaj hramadzianskaj pazicyjaj». Hetym letam Volha adpačyvała ŭ Jałcie, jakuju nazvała «Łos-Andželesam pa-rusku».
Ivan Ščerbin
(20 hadoŭ, student histfaka BDU, Masiukoŭščynskaja akruha)
Chłopiec źjaŭlajecca siabram aficyjnaj Kamunistyčnaj partyi, pry hetym karystajecca biełaruskaj movaj. «Lepš było zastacca ŭ Sajuzie. Biełaruś u składzie SSSR była jak u składzie niejkaha ciahnika. Pieršy vahon — RSFSR, a Biełaruś — druhaja ci treciaja», — kazaŭ Ščerbin u adnym intervju.
Niahledziačy na kamunistyčnyja pohlady, Ivan stabilna pieradrukoŭvaje na svaju staronku pasty z pravasłaŭnych pablikaŭ. Krasujecca na adkryćci pomnika Simonu Balivaru ŭ Minsku, fatahrafujecca z apošnim kiraŭnikom HDR Ehanam Krencam i ministram adukacyi Iharam Karpienkam. Nie zabyvajecca Ivan addavać reśpiekt i kiraŭniku krainy.
Mikita Siemianienka
(22 hady, namieśnik dyrektara pa markietynhu PP «Siealina», Kuncaŭščynskaja vybarčaja akruha)
Pradstaŭnik Ruchu «Za Svabodu». Za toje, što źjeździŭ naziralnikam na vybary ŭ Hruziju, u svoj čas Siemianienku vyklučyli z druhoha kursa žurfaka BDU. U vyniku chłopiec nie prapaŭ, ale navučaŭsia ŭ Toruni i ispanskaj Hranadzie, ale na biełaruskuju palityku nie zabyŭsia.
Siemianienka byŭ viadomy tym, što arhanizoŭvaŭ pratest suprać pryjezdu ŭ Biełaruś «Načnych vaŭkoŭ». U sacsietkach piša vyklučna pa-biełarusku pra padziei ŭ krainie i śviecie.
Marta Hancoŭskaja
(27 hadoŭ, v.a. pieršaha sakratara Frunzienskaha RK BRSM, Adojeŭskaja vybarčaja akruha)
Funkcyjanierka BRSM. Nazyvaje na svajoj staroncy Hiermaniju «rajem» i «kazkaj». Słuchaje Maksa Karža, ŁSP i Oxxxymiron. Asablivaha ŭschvaleńnia ciapierašniaha ładu na jaje staroncy nie znajści. Chiba što źviartaje ŭvahu sustreča kitajskaj delehacyi, dzie Marta staić pad ahramadnym ordenam Lenina.
U miascovyja saviety jaje naŭrad ci puściać, bo pa toj samaj akruzie idzie dyrektar škoły №56.
Mikita Krasnakucki
(21 hod, apieratar dyfuzijnych pracesaŭ «Intehrała», Traktarazavadskaja vybarčaja akruha)
Aktyvist «Moładzi BNF», nie tak daŭno sastupiŭ vybary staršyni Hańnie Śmilevič. Navučaŭsia ŭ Biełaruskim nacyjanalnym techničnym univiersitecie.
Pravodzić dosyć aktyŭnyja pikiety ŭ svaju padtrymku, ź bieł-čyrvona-biełymi ściahami, muzykami. Kaža, što zusim nie małady dla deputata miascovaha savieta. Patryjot Biełarusi — šmat zdymkaŭ na nacyjanalnuju tematyku.
***
Na telehram-kanał «Našaj Nivy» možna padpisacca tut.
