Letaś pry Ministerstvie adukacyi była stvoranaja hramadska-kansultacyjnaja rada. Chto ŭvajšoŭ u jaje skład?
Staršynia Minskaha mižnarodnaha adukacyjnaha centra imia Jochanesa Rau Viktar Bałakiraŭ, deputatka Alena Anisim, dyrektar Nacyjanalnaj biblijateki Raman Matulski, pradstaŭniki škoł i ŭniviersitetaŭ, u pryvatnaści — dekan fiłasofskaha fakulteta BDU Vadzim Hihin, a taksama ravarystka Natalla Cylinskaja, žonka ministra zamiežnych spraŭ Makieja i aktrysa Viera Palakova, salistka opiery Nina Šarubina i mnohija inšyja ludzi — ahułam 25 čałaviek.
Pa jakim pryncypie adbiralisia hetyja ludzi?
U Ministerstvie adukacyi «Našaj Nivie» patłumačyli, što heta abo źviazanyja z adukacyjaj ludzi, abo tyja, «kamu jana nie abyjakavaja — baćki dziaciej, jakija vučacca». Ź imi, maŭlaŭ, abmiarkoŭvajucca ŭsie płanujemyja źmieny.
Čym hetaja rada zajmajecca? Pra heta «Našaj Nivie» raskazała Alena Anisim.
«Takija rady isnujuć pry roznych ministerstvach. Meta — padčas abmierkavańnia ŭnosić prapanovy, abaznačać vykliki. Ja nakiroŭvała na razhlad prapanovy adnosna pavieličeńnia roli biełaruskaj movy. Ale pakul nie było pasiedžańnia, kab padvieści vyniki, bo sustrakajemsia my nie vielmi časta — tolki try razy ŭ 2017 hodzie. Što skazać pra aktrys i spartoŭcaŭ? Heta, nakolki mnie viadoma, publičnyja asoby — pradstaŭniki baćkoŭskaj supolnaści. A na pasiedžańniach našych zvyčajna prysutničaje ministr abo pieršy namieśnik, abo ministr z namieśnikami razam», — patłumačyła Anisim.
