Načalnik hałoŭnaha ideałahičnaha ŭpraŭleńnia Ministerstva abarony, pamočnik ministra Alaksandr Hura ŭ čas žyvoj telefonnaj linii adkazaŭ na pytańnie žurnalista «Našaj Nivy» pra pracesy biełarusizacyi ŭ vojsku.
Alaksandr Hura
Dyjałoh byŭ taki:
«Naša Niva»: Kali my ŭbačym niejkija pracesy biełarusizacyi ŭ vojsku? Kolki siužetaŭ pa-biełarusku na telekanale Minabarony «Vajar»? Nikolki. A kolki hienierałaŭ vystupili pa-biełarusku? Nahadaju, što i z sajta Minabarony niekalki hod tamu źnikli i dahetul nie adnavilisia artykuły pra Kaściušku, Davyda Haradzienskaha dy inšych našych vajaroŭ».
Alaksandr Hura: «Heta vašaje asabistaje mierkavańnie. Vy majecie prava na jaho. Ale my stroha kirujemsia zakanadaŭstvam Biełarusi, u nas dźvie movy dziaržaŭnyja, luby vajennasłužačy maje prava havaryć na luboj movie, vajskovaja prysiaha ŭ nas prymajecca na luboj movie.
Ja liču, što vašaje pytańnie ŭtrymlivaje padtekst, nibyta ničoha ŭ hetym kirunku [biełarusizacyi] nie robicca, ničoha padobnaha!
Našyja ŭzbrojenyja siły źjaŭlajucca armijaj našaj dziaržavy, armijaj niezaležnaj krainy. Skažu, što ŭ rocie hanarovaj varty, jakaja supravadžaje kiraŭnika dziaržavy na sustrečach, raparty pa-biełarusku ažyćciaŭlajucca.
Pytańni, źviazanyja z farmiravańniem patryjatyčnaj śviadomaści, zasnavanyja pieradusim na hałoŭnych nacyjanalnych intaresach: suvierenitet, niezaležnaść, terytaryjalnaja nieparušnaść Biełarusi. Detali, pra jakija vy kažacie, pastupova razhladajucca ŭ płanie adpaviednaści nacyjanalnym intaresam našaj Radzimy».