Syny Alesia Sapiehi Mark (źleva) i Łars. Fota Alesia Sapiehi.
Hety śpis daškolnych ustanoŭ sa źviestkami Ministerstva adukacyi na 2017/2018 hod apynuŭsia ŭ rukach hramadskaści dziakujučy namahańniam aktyŭnaj biełaruskaj maładoj mamy, viadomaj architektarki i dyzajnierki Alaksandry Bajarynaj. Jana ž pieradała jaho kamandzie Svaje.by, jakija litaralna za niekalki dzion nanieśli ŭsie 102 sadki na mapu i raspracavali zručnuju formu zvarotnaj suviazi z baćkami.
Minčanka stvaryła čat dla baćkoŭ, jakija chočuć biełaruskamoŭny sadok
«My nie ŭpeŭnienyja, što ŭsie hetyja biełaruskamoŭnyja hrupy nasamreč biełaruskamoŭnyja. Dakładna biełaruskamoŭnyja dva sady — №187 i №534 — dzie navučańnie viadziecca całkam pa-biełarusku. My padazrajem, što bolšaść astatnich hrup — heta fikcyja, tamu zaklikajem baćkoŭ pisać vodhuki. U nas dla hetaha na sajcie ŭsio jość, pad kožnym sadkom možna napisać, jakaja tam realnaja situacyja», — kamientuje zasnavalnik prajektu Svaje.by Pavieł Kołas.
Ciapier baćkoŭskaja supolnaść moža sfarmavać praŭdzivyja rejtynhi ŭsich hetych 102 sadkoŭ. Vy aŭtaryzujeciesia [možna praz fejsbuk], klikajecie na luby sad, kab pabačyć bolš padrabiaznuju infarmacyju pra jaho dy kantakty i naciskajecie «Pakinuć vodhuk». Tut vy bačycie nad polem dla kamientavańnia try punkty: piersanał, materyjalnaja baza, mova. Nasuprać ich stajać zorački — jany i vyznačajuć rejtynh sada pa kožnym z punktaŭ.
Voźmiem punkt «Mova»:
- 1 zoračka — «Adna nazva, nichto pa-biełarusku nie havoryć»
- 2 zorački — «Možna pačuć asobnyja słovy pa-biełarusku»
- 3 zorački — «Supracoŭniki častkova razmaŭlajuć pa-biełarusku, dzietak biełaruskamoŭnych vobmal»
- 4 zorački — «Piersanał razmaŭlaje pieravažna pa-biełarusku, jość biełaruskamoŭnyja dzieci ŭ hrupie»
- 5 zoračak — «Vydatna! Usio pa-biełarusku!»
«Što tyčycca samich vodhukaŭ, to my zrabili mahčymaść dasyłać ich ananimna, nie ad svajho imia. Heta zroblena, kab nichto ŭ sadku nie mieŭ zub, kali vodhuk nie vielmi dobry. Tym nie mienš, adpravić jaho možna tolki aŭtaryzavaŭšysia. Heta značyć, što Svaje.by buduć viedać, chto pakinuŭ vodhuk, ale bolš nikomu hetaja infarmacyja nie budzie dastupnaja. Usie vodhuki publikujucca tolki paśla pravierki, jany buduć pieračytvacca maderataram, — tłumačyć Pavieł. — Kali karystalnik upieršyniu adpraŭlaje vodhuk, to sajt prapanuje jamu prajści sms-pravierku pa numary telefona. Ale kali chtości nie zachoča jaje prachodzić, heta nie strašna, vodhuk usio adno zachavajecca».
Karta biełaruskamoŭnych sadkoŭ Minska
Na sadkach kamanda prajekta nie źbirajecca spyniacca, chutka abiacajuć apublikavać śpis usich škoł Minska ź biełaruskamoŭnym navučańniem.
Taksama Pavieł kaža, kab baćki z abłasnych haradoŭ, zacikaŭlenyja ŭ stvareńni takich kart sadoŭ i škoł dla ich rehijona, pisali pra heta i dasyłali infarmacyju na Svaje.by. Budzie zapyt — budzie i mapa.
