Prezident Ukrainy Piatro Parašenka z 1 pa 8 studzienia pravioŭ kaladny adpačynak na Maldyvach. Parašenka lataŭ tudy na pryvatnym, arandavanym u tureckaj kampanii, samalocie razam ź siamju pasažyrami. Jany, imavierna, nie prachodzili pašpartny kantrol i lacieli pad padstaŭnymi imionami. Pa padlikach žurnalistaŭ, prezident vydatkavaŭ na kanikuły prynamsi 500 tysiač dalaraŭ.

Ab hetym paviedamlajecca ŭ rasśledavańni ŭkrainskaj prahramy «Schiemy».

Žurnalisty śćviardžajuć, što Parašenka vylecieŭ z Kijeva ŭ mižnarodny aeraport horada Male na Maldyŭskich vyspach 1 studzienia i viarnuŭsia 8 studzienia.

Ab viartańni ŭ Kijeŭ «Schiemy» daviedalisia na publičnym anłajn-resursie FlightRadar. Na im jany prasačyli za samalotam z bartavym numaram TS-KMR, jaki pierasiok Indyjski akijan. Pa infarmacyi žurnalistaŭ, u im byŭ prezident Ukrainy.

Pierad pryjezdam žurnalisty «Schiem» zafiksavali, jak u aeraport Kijeŭ padjechała niekalki mikraaŭtobusaŭ i Land Cruiser z vyklučanymi farami.

Paśla žurnalisty sfatahrafavali pasadku pryvatnaha samalota i adznačyli, što jon pryparkavaŭsia ŭ najbolš addalenaj častcy aeraporta.

«Žurnalisty «Schiem» zafiksavali, jak samalot spyniŭsia, a ŭžo praz 4 chviliny kartež pakinuŭ terytoryju aeraporta. Jon składaŭsia z čatyroch multyvienaŭ Volkswagen i Mercedes i źjechaŭ na kalcavuju darohu», — raspaviali ŭ «Schiemie».

Adznačajecca, što kartež prajechaŭ biez probliskavych majačkoŭ i mihciełak. Mašyny nakiravalisia ŭ pasiołak Kozina, dzie mieścicca pryvatny majontak Piatra Parašenki.

Žurnalisty daviedalisia pra detali adpačynku prezidenta. U pryvatnaści, stała viadoma, što prezident uziaŭ u arendu pryvatny samalot Falcon 7X u tureckaj avijakampanii Setair.

«Schiemy» nakiravali list avijakampanii i spytali pra košt pieralotu na Falcon 7X. Zhodna z pradstaŭlenaj infarmacyjaj, žurnalisty vykazali zdahadku, što arenda borta z prastojem na praciahu amal usiaho pieryjadu adpačynku kaštavała prezidentu prykładna ŭ 154 000 jeŭra.

Adznačajecca, što ŭ samalocie 1 studzienia vylecieli z Kijeva na Maldyvy, a 8 studzienia viarnulisia ŭ stalicu 8 pasažyraŭ — 3 mužčyn i 5 žančyn. Adnak siarod imionaŭ pasažyraŭ nie było ni prezidenta, ni siabroŭ jaho siamji ci inšych viadomych imionaŭ.

Akramia taho, jany daviedalisia, što Parašenka adpačyvaŭ na Maldyŭskich vyspach z 2 pa 8 studzienia ŭ piacizorkavym kurortnym hateli Cheval Blanc. Jon składajecca tolki z pryvatnych vił pasiarod Indyjskaha akijana.

«Z aeraporta Male, kudy prezident i jaho hości prylacieli čartaram, jany dabralisia da astraŭnoha kurorta. 8 darosłych i 2 dziaciej pasialilisia na samaj darahoj vile kurorta, jaki raźmieščany na asobnaj vyśpie», — havorycca ŭ rasśledavańni.

Ukrainski prezident adpačyvaŭ tam z haściami na praciahu siami dzion i šaści načej.

U «Schiemie» adznačajuć, što na kurorcie Parašenka fihuravaŭ pad imiem Mr. Petro Incognito (Ukraine). Žurnalisty tłumačać, što heta typovaja pasłuha dla kurorta takoha ŭzroŭniu — zabieśpiačeńnie poŭnaj ananimnaści pa prośbie hościa.

Pavodle infarmacyi krynic žurnalistaŭ, prezident vydatkavaŭ za pražyvańnie 276 000 dalaraŭ. Taksama ŭ jaho byli dadatkovyja vydatki — 37 550 dalaraŭ. 

Usiaho, pa padlikach žurnalistaŭ, Parašenka vydatkavaŭ na kaladny adpačynak na Maldyŭskich vyspach nie mienš za 500 000 dalaraŭ.

Žurnalisty adznačyli, što dasłali zapyt u administracyju prezidenta razam z dokazami pajezdki Parašenki. Na nastupny dzień administracyja prezidenta paćvierdziła fakt adpačynku kiraŭnika dziaržavy na Maldyvach ahienctvu «Interfaks-Ukraina».

Za dzień da efiru prahrama «Schiemy» atrymała adkaz na zapyt z anałahičnym tekstam. U prezidenta pryznali sam fakt pajezdki i zapeŭnili, što jon zadekłaruje vydatki na jaje.

Клас
0
Панылы сорам
0
Ха-ха
0
Ого
0
Сумна
0
Абуральна
0