Pieršy tom piersanalnaj encykłapiedyi «Janka Kupała» prezientujuć 31 studzienia ŭ Dziaržaŭnym litaraturnym muziei Janki Kupały ŭ Minsku, paviedamlaje BiełTA. Kniha vyjšła ŭ vydaviectvie «Biełaruskaja encykłapiedyja imia Pietrusia Broŭki» ŭ kancy minułaha hoda.
Hetaje bahata ilustravanaje vydańnie ŭklučaje kala 1,5 tys. artykułaŭ. Siarod ich litaraturaznaŭčyja, jakija tyčacca tvorčaści biełaruskaha pieśniara, pra ludziej, jakija mieli važnaje značeńnie ŭ losie paeta, pra tych, na čyj los paŭpłyvała fihura Janki Kupały. Tyraž — 1,5 tys. asobnikaŭ.
Jašče ŭ 1986 hodzie byŭ vypuščany encykłapiedyčny daviednik «Janka Kupała» u adnym tomie. Za bolš čym try dziesiacihodździ adkrylisia novyja staronki pamiaci pra Kupału, abstaviny jaho hramadskaj, litaraturnaj dziejnaści. U vyniku kupałaznaŭstva atrymała šyroki razmach. Heta i źjaviłasia šturškom da praciahu pracy nad stvareńniem maštabnaha vydańnia pra kłasika ajčynnaj litaratury.
U vydańni raspaviadajecca pra pierakładčykaŭ tvoraŭ Kupały na ruskuju, kazachskuju, hruzinskuju, bałharskuju, tatarskuju, čuvašskujuja, turkmienskuju i inšyja movy. Asobna vydzieleny temy: «Armianskaja litaratura i Janka Kupała», «Anhłamoŭny śviet i Janka Kupała», «Azierbajdžanskaja litaratura i Janka Kupała» i inšyja.
U knizie sabranyja źviestki pra miescy, dzie ŭ svoj čas pabyvaŭ Kupała: Rasii, Hruzii, Słavakii, Finlandyi i inš. Pry sadziejničańni Dziaržaŭnaha litaraturnaha muzieja Janki Kupały ŭ vydańnie ŭvajšli artykuły pra Lva Daškieviča — aŭtara mastackich fotapartretaŭ Kupały 1923 i 1924 hadoŭ, šlachieckim rodzie Zambžyckich, jaki vałodaŭ majontkam Viazynka, a taksama bolš za 300 ilustracyj.
Siarod aŭtaraŭ artykułaŭ — navukoŭcy Nacyjanalnaj akademii navuk Biełarusi, šerahu univiersitetaŭ krainy. U hetym hodzie płanujecca vydańnie druhoha toma encykłapiedyi i knihi adnaho vierša Janki Kupały «A chto tam idzie?» u pierakładzie na 100 movaŭ śvietu.
U 2017 hodzie kupałaŭskaj tematycy byli pryśviečany i inšyja knihi vydaviectva: «Janka Kupała» ŭ sieryi «Biełaruskaja dziciačaja encykłapiedyja», a taksama kniha vieršaŭ dla dziaciej «Chłopčyk i lotčyk».
