Dzień Voli ŭ 2016 h., fota Siarhieja Hudzilina
Pradstaŭniki arhkamiteta śviatkavańnia sotych uhodkaŭ abviaščeńnia niezaležnaści Biełaruskaj Narodnaj Respubliki — Pavał Sieviaryniec, Ihar Lalkoŭ, Jaŭhien Afnahiel — u žyvym efiry Svabody raskazali pra chadu padrychtoŭki da adznačeńnia jubileju.
Pavodle Paŭła Sieviarynca, znakavaja hadavina abjadnała apazicyju — badaj, upieršyniu za apošnija 10-15 hadoŭ. Ciapier staić zadača dałučyć da kampanii dziaržaŭnych čynoŭnikaŭ, jakija taksama musiać uśviadomić značnaść BNR dla siońniašniaj biełaruskaj dziaržavy.
Jak udakładniŭ Jaŭhien Afnahiel, arhkamitet hatovy da pieramovaŭ z uładami. Pa jaho słovach, kali kiraŭniki prezidenckaj administracyi ŭ asobach Kačanavaj, Ryžankova dy inšych paćvierdziać takoje žadańnie, usie buduć tolki radyja. Ale pakul nichto sa słužboŭcaŭ svaich płanaŭ nie ahučyŭ
Adzin z zajaŭnikaŭ akcyi Ihar Lalkoŭ vykazaŭ spadziavańnie, što sioleta rašeńnie nie budzie prymacca, jak u raniejšyja hady. Zhodna z zakanadaŭstvam, adkaz musić być dadzieny nie paźniej, čym za piać dzion da padziei. Praŭda, letaś heta zdaryłasia ledź nie napiaredadni, što ŭ vyniku pryviało da hvałtu z boku śpiecnazu i masavych aryštaŭ.
Aficyjnaja nazva — «Śviata niezaležnaści»
Pavał Sieviaryniec, u svaju čarhu, raskazaŭ, što płanujecca nie prosta šarahovaje šeście. Viadučyja mastaki supołki «Pahonia», dyzajniery ciapier pracujuć nad afarmleńniem spadarožnaha anturažu. Aficyjnaja nazva — «Śviata niezaležnaści».
Najaŭnaść płana «B» na vypadak, kali ŭłady nie dazvolać śviatkavać 100-hodździe niezaležnaści BNR u centry stalicy, čalcy arhkamiteta raskryvać nie stali. Pachod na płošču Banhałor, kudy zvyčajna vypraŭlajuć mitynhavać apazicyju, nie razhladajecca. Tolki płan «A», udakładnili jany. Adzinaje, skazali, što buduć zroblenyja dźvie jurydyčnyja sproby.
Finalnaj častkaj musić stać vialiki kancert pad adkrytym niebam na płoščy Svabody, dzie niekalki apošnich hadoŭ ładziacca masavyja kulturna-vidoviščnyja imprezy. Pavodle pradstaŭnikoŭ arhkamiteta, zaprašeńnie vystupić sa sceny ŭžo atrymali ci jašče atrymajuć znakavyja artysty — Lavon Volski, Siarhiej Michałok dy inšyja.
Padsumoŭvajučy svaje plany, pradstaŭniki arhkamiteta zajavili, što pieradusim pracujuć nad tym, kab ułady pryniali prapanavany scenar u poŭnym abjomie.
