Alaksandr Łukašenka nakiravaŭ u adras prezidenta Mižnarodnaha alimpijskaha kamiteta Tomasa Bacha pretenzii z nahody sudziejstva ŭ dačynieńni da biełaruskaha frystajlista Antona Kušnira. Ab hetym kiraŭnik dziaržavy zajaviŭ siońnia žurnalistam paśla hałasavańnia na vybarach u miascovyja Saviety deputataŭ, pieradaje BIEŁTA.
«Naša fiederacyja sprabavała paśla hetaha padać pratest, pierahavaryć pa-dobramu sa svaimi kalehami ŭ Pchiončchanie — mižnarodnaj fiederacyjaj. Adkaz byŭ jasna jaki. Mnie pryjšłosia nočču padniać pa tryvozie MZS, zadziejničać pasolstva ŭ Respublicy Kareja. Nakiravać nieadkładna ŭradavuju telehramu na adras Bacha. Vykazaŭ jamu ŭsio, jak ja dumaju, u miakkaj formie. My heta ŭsio apublikujem. My chavać heta nie budziem», — zajaviŭ Łukašenka.
Jon adznačyŭ, što jamu ŭžo telefanavali z ofisa kiraŭnika MAK i paviedamili, što dali kamandu razabracca i pryniać miery. «Aburyłasia ŭžo ŭsia hramadskaść spartyŭnaja, iduć sihnały, što heta nie narmalna», — skazaŭ Alaksandr Łukašenka.
Jon padkreśliŭ, što adpaviednyja pretenzii ŭ adras kiraŭnictva MAK byli padpisanyja im nie tolki jak prezidentam Nacyjanalnaha alimpijskaha kamiteta, ale i kiraŭnikom dziaržavy. «Ja nie dumaju, što tam buduć pryniatyja ŭ našu karyść rašeńni. Kali hetych rašeńniaŭ nie budzie, što dalej… Značyć, dumaju, što hetaja hutarka razam ź inšymi razmovami i pytańniami, jakija ŭźnikli ŭ mižnarodnym sporcie, treba pieranieści na placoŭku Mižnarodnaha alimpijskaha kamiteta. Za hetyja 20 hadoŭ, što ja pracuju prezidentam NAK, ja ni razu nie byŭ na hetych siesijach, ale dumaju, što mnie treba tam u bližejšy čas pabyvać, kab hetaje sonnaje palityzavanaje carstva troški razvarušyć. Zanadta dobra žyviecca. Dzielać hetych ludziej zahadzia pa ranhach, i pačynajuć dzialić miedali: chto macniejšy palityčna, toj i atrymlivaje miedal. Tak być nie pavinna!» — padkreśliŭ Łukašenka.
«Jany prosta, adkryta vam skažu, jak čałaviek, jaki trochi ŭ hetym raźbirajecca, vykinuli hałoŭnaha kankurenta ź finału», — skazaŭ Łukašenka pra sudziejstva adnosna Kušnira.
Anton Kušnir zaŭsiody vyłučajecca vysokaj stabilnaściu ŭ svaich vystupach, padkreśliŭ Alaksandr Łukašenka. «Žalezabietonny mužyk, jon nie robić nijakich pamyłak. Jany zrazumieli, što heta nie prosta finalist, — heta znoŭ čempijon Alimpijskich hulniaŭ», — skazaŭ Łukašenka.
Alaksandr Łukašenka nahadaŭ, što ŭ składzie sudziejskaj kalehii byli ŭ tym liku pradstaŭniki Rasii, Kitaja i Šviejcaryi. «Usie jany praciahnuli ŭ finał svaich spartsmienaŭ, — ličyć kiraŭnik dziaržavy. — Jany jaho [Kušnira] pasprabavali vykinuć u pieršaj sprobie kvalifikacyi, a ŭ druhoj im prosta ničoha nie zastavałasia, jak zrabić jaho siomym, bo šaściora prachodzili».
«Kali b razumnyja byli, dyk chacia b u finał puścili. Ale jany razumieli: puści jaho ŭ finał — usim budzie «truba». I znoŭ biełarusy dva zołata, jak i na minułaj Alimpijadzie, mohuć zavajavać», — skazaŭ Łukašenka.
Kiraŭnik dziaržavy taksama źviarnuŭ uvahu, što ŭ lubym sporcie lidaraŭ siezonu starajucca nie vykidvać sa spabornictvaŭ jašče na etapie kvalifikacyi, bo vystupy takich spartsmienaŭ cikavyja dla hledačoŭ, zaŭziataraŭ. «Tut i z hetym nie paličylisia, choć… jon vydatna vykanaŭ dva skački», — padkreśliŭ Alaksandr Łukašenka.
«Ab sudździach: ja mahu zrazumieć šviejcarcaŭ, nie vielmi razumieju našych siabroŭ kitajcaŭ i admaŭlajusia naohuł razumieć našych starejšych bratoŭ — rasijan. Nu, prajšoŭ Buraŭ [rasijski frystajlist], treba druhoha rasijanina zaciahnuć. Za košt biełarusa!? Navošta? Voś maralnaja pazicyja sudździaŭ. Tamu heta sucelnaje biazładździe, ja jaho inakš rastłumačyć nie mahu», — zajaviŭ kiraŭnik dziaržavy.
Alaksandr Łukašenka paraiŭ Antonu Kušniru nie chvalavacca, bo napieradzie ŭ jaho žyćci budzie jašče šmat spabornictvaŭ. Jon taksama vykazaŭ nadzieju, što biełaruski frystajlist Stanisłaŭ Hładčanka zdoleje paśpiachova vystupić.
Kušnir nie trapiŭ u finał, prajhraŭšy šviejcarcu 0,45 bała. Taho ciahnuŭ napierad šviejcarski sudździa
