Dva hady tamu my paznajomili Vas z Vadzimam Makiejem — maładym haspadarom kramy nacyjanalnaha adzieńnia «Darečy», što ŭ handlovym centry «Siłuet» kala mietro «Jakuba Kołasa». Siońnia Vadzim raskaža čytačam «NN» pra toje, jak jon i jaho biznes vytrymali hety pieryjad.
— Vy dva hady zajmajeciesia kramaj «Darečy». Jak biznes źmianiŭsia za hety čas? Pašyryŭsia/ścisnuŭsia/zastaŭsia na tym ža ŭzroŭni? Ci prynosić jon prybytak, ci davodzicca inviestavać ź niejkich inšych «kišeniaŭ»?
Vadzim Makiej: Tak, minuła dva hady, navat ciažka pavieryć. Biznes źmianiŭsia, biassprečna. Hałoŭnaje, ludzi zvyklisia z tym, što biełaruskija simvały i biełaruskaja mova — heta niešta dobraje i zvyčajnaje. Bo, pamiataju, kali my pačynali, reakcyja była roznaja. Źmianiłasia i pakupnickaja zdolnaść, vielmi adčuvajecca. Ale heta nie prosta biznes dla nas z baćkam — heta naša žyćciovaja pazicyja, i ŭsia hetaja sprava była zroblena nami ad pačatku na svaich srodkach. Tak, byvaje ciažka, ale my robim hodnuju spravu. Nu i, viadoma, kali niechta pažadaje inviestavać ci achviaravać u našuju spravu, suprać nie budziem. Ale pakul kožnaja kapiejka — našaja ŭłasnaja ŭ hetaj spravie.
— Jak uvohule pryjšła ideja zasnavać «Darečy»? Ci zajmalisia vy i vašy baćki pradprymalnictvam da hetaha?
VM: Pradprymalnictvam da hetaha ni ja, ni moj baćka nie zajmalisia. Ale ja vielmi ŭdziačny losu, što my da hetaha pryjšli. Navat ciažka pieradać jaki heta kaštoŭny dośvied, kali ty razam z baćkam zajmaješsia spravaj, jakaja tabie pa dušy. Chapaje ŭ nas i nieparazumieńniaŭ i niejkija kanflikty z-za roźnicy pakaleńniaŭ, padychodaŭ i kirunkaŭ raźvićcia, ale heta robić našyja adnosiny jak baćki i syna macniejšymi.
— Raskažycie trochi pra siamju: chto vašy baćki, adkul karani. I ci nie radnia vy ministru zamiežnych spravaŭ.:) Darečy, pra siamju: mahčyma, u Vas za dva hady źjaviłasia i ŭłasnaja siamja?
VM: Maje baćki — cudoŭnyja i mocnyja ludzi. Ja adziny ŭ siamji, a karani iduć na zachad Biełarusi. Tak, z nahody proźvišča, časta atrymlivaju hetaje pytańnie, i zdarajucca cikavyja situacyi čas ad času:) Uvohule, ja čuŭ što jość dva bujnyja miescy bytavańnia proźvišča Makiej, adno bližej da Viciebska, druhoje da Harodni. Našyja miaściny bližej da Harodni, jak i našaha ministra zamiežnych spraŭ. Tamu nie vyklučaju, što my niedzie daloka moža i svajaki, ale da hetaha spakojna stavimsia i śpiecyjalna nie šukajem takija suviazi. Nakont ułasnaj siamji: tak, ja znajšoŭ svajo kachańnie i vielmi ciešusia.
Adna z kalekcyj «Darečy»: śvitšoty, pryśviečanyja Miensku.
— Vy zasnavali «Darečy» na ŭzdymie cikavaści da nacyjanalnaj atrybutyki. Ciapier pieršasny popyt zadavoleny. Jak za dva hady źmianilisia zapyty pakupnikoŭ? Što najbolš brali tady i što ciapier cikavić ludziej?
VM: Jak tady, tak i ciapier, ludzi pierš za ŭsio źviartajuć uvahu na canu. Ja b nie skazaŭ, što popyt vielmi źmianiŭsia, prosta treba ŭvieś čas vydumlać niešta novaje, jak u luboj spravie, kali ty žadaješ dasiahnuć pośpiechu.
— Vam davodzicca vytrymlivać niesłabuju kankurencyju: u centry Minska chapaje kramaŭ z «vyšyvankavym» asartymientam - navat dziaržaŭnyja pačali padklučacca. Čym pryvablivajecie pakupnika? Ci, moža, sprabujecie supracoŭničać ź inšymi pradaŭcami?
VM: Robim akcyi, rozyhryšy. Časy nie samyja lepšyja, tamu namahajemsia dempinhavać i pakazyvać ludziam, što ŭ nas tavar možna nabyć tańniej, ale z toj ža jakaściu i ŭ našaj kramcy! Tak, usich astatnich našych «kankurentaŭ» my viedajem, ja b ich navat tak nie nazyvaŭ, tamu što my z usimi ŭ narmalovych adnosinach.
U sieryi «Darečy, biełarus» vyjšli cišotki z vyjavami Marka Šahała, Vasila Bykava i Barysa Kita.
— Vy spałučajecie biznes z vučobaj. Ci ŭzajemaźviazanyja Vaša budučaja śpiecyjalnaść i krama «Darečy»?
VM: Vučusia ja ŭ Biełaruskim nacyjanalnym techničnym univiersitecie, na čaćviortym kursie fakulteta mieniedžmientu, markietynhu i pradprymalnictva (FMMP). Voś užo skančaju amal, zastałosia napisać dypłom:) Mnie vielmi padabajecca toje, što my robim, pahladzim jak składziecca dalej, chaciełasia b pasprabać i jašče jakuju-niebudź halinu raźvićcia.
— U HC «Siłuet» vy krama z dosyć nietypovym asartymientam. Jak reahavali na vaša źjaŭleńnie susiedzi pa handlovaj zale? Jak staviacca ciapier?
VM: U nas cudoŭnyja susiedzi, niedarečnaściaŭ nie było. Usio cudoŭna.
— Moža, chtości taksama sprabuje brać u asartymient rečy z nacyjanalnym kałarytam?
VM: Tak, sustrakajem niejkija rečy, čas ad času. Nu i sami pradaŭcy chodziać usie sa stužačkami biełaruskimi, birulkami — biełarusizujem:)
— Ci sutykalisia Vy za čas pracy z prajavami adkrytaj varožaści ź niečaha boku?
VM: Oj, moža kali i było… Ale krajnie redka. Dyj my z baćkam nie z maleńkich chłopčykaŭ, abodva zajmajemsia sportam: ja zajmajusia boksam, a baćka ŭ mianie i ciapier amal u 50 padciahvajecca 20 razoŭ. Karaciej da nas jašče treba aśmielicca prajavić varožaść.:)
Jość u kramie i cišotki, pryśviečanyja paŭstańniu Kalinoŭskaha.
— Jaki samy niezvyčajny pakupnik u Vas byŭ? Moža, chtości ź viadomych ludziej da Vas zavitvaŭ? Što kuplali?
VM: Moža padacca, što heta sumnaja praca — siadzieć i pradavać… Ale byvajuć vypadki, jakija nie pakinuć abyjakavym. Naprykład, kali babulka nie moža strymać śloz, kali bačyć Pahoniu ŭ centry Minska ŭ našaj kramcy i kaža, što ŭžo nie dumała, što dažyvie da takich časoŭ… Uvohule kožny pakupnik niečym admietny, moža i słova lišniaha nie skazać, ale niešta ŭ im čaplaje. Znakamitaściaŭ taksama było niamała, na palcach nie pieraličyš.
— Jakija cikavyja brendy nacyjanalnaha adzieńnia źjavilisia za hetyja dva hady, na što raicie źviarnuć uvahu?
VM: Samaje hałoŭnaje, što my stali vypuskać adzieńnie pad ułasnaj nazvaj «Darečy», taksama zapuścili sieryju cišotak «Darečy, Biełarus» i žadajem praciahvać. Šmat z kim pracujem. Naprykład z LSTR Adziennie, hanarymsia, što ŭ našaj kramcy jość takija rečy. Astatniaje lepš pabačyć ułasnymi vačyma, zavitaŭšy da nas.
— Ujavicie Vaš biznes praź dziesiać hadoŭ. Ci jość stratehičny płan na taki čas?
VM: Žyviom i pracujem siońniašnim dniom, ciažka ŭjavić siabie praź dziesiać hod, heta pałova majho žyćcia na dadzieny momant, biznes tym bolš ciažka.
— Čym paradujecie kupcoŭ bližejšym časam? Viasna idzie:)
VM: Tak, budzie dosyć roznych rečaŭ. I štości novaje i niešta pieravydadzim, usio što budzie planavacca i vyjdzie, možna budzie znajści ŭ našych supołkach u sacyjalnych sietkach:
