Historyja pra vaśmimiesiačnaje dzicia, jakomu sabaka prakusiŭ hałavu, vyklikała vialiki rezanans. Na ščaście, u hetym vypadku trahiedyi ŭdałosia paźbiehnuć. Chłopčyka vyratavali viciebskija daktary, pravioŭšy šmat u čym unikalnuju apieracyju. Padrabiaznaści raspaviała na svaich staronkach hazieta «Respublika».
Ryzyka infiekcyi, pa słovach niejrachirurha Ihara Cichamirava, jaki apieravaŭ dzicia, zastajecca i ciapier — zuby sabaki nijak nielha nazvać sterylnymi, jaho ślina pranikła hłyboka. Tamu chłopčyk jašče niekatory čas praviadzie na balničnym łožku.
— Maleńki pacyjent, jakoha pieravozili na reanimabili, byŭ jašče ŭ darozie, a my ŭžo poŭnym chodam rychtavalisia da apieracyi. Z Navapołacka nam pa elektronnaj pošcie skinuli vyniki kampjutarnaj tamahrafii. Razam z hałoŭnym dziciačym niejrachirurham krainy Michaiłam Tałabajevym my zahadzia abmierkavali taktyku pieravozki paciarpiełaha, sam chod apieracyi. Viadoma ž, usie momanty pradbačyć było składana, niešta pryjšłosia karektavać užo za apieracyjnym stałom, — uspaminaje Ihar Cichamiraŭ.
Niemaŭla pryvieźli ŭ prytomnaść, jano było na rukach u mamy. Jak raspavioŭ niejrachirurh, u dziciaci było vosiem prakołaŭ zubami sabaki z dvuch bakoŭ — ciemiannaja vobłaść, vušnyja rakaviny. Adna z ran — pranikalnaja ŭ čerap, askiepak — paŭtara santymietra. Mazhavaja abałonka i sam mozh paškodžany. Apieracyja išła kala dźviuch hadzin, Iharu Cichamiravu dapamahaŭ niejrachirurh Anton Erdman. Malaniaci praviali trepanacyju čerapa, prybrali adłomki ŭvahnutaj kostki, usio apracavali. Sutki dzicia znachodziłasia ŭ miedykamientoznym śnie. Potym jaho vyvieli sa štučnaj komy, na treci dzień jano ŭžo ŭśmichałasia.
— Na tym my z maleńkim pacyjentam i raźvitalisia — jon paśpiachova adbyŭ u Minsk. Ci jość u tym, što zdaryłasia, vina darosłych členaŭ siamji? Spračacca, viadoma, možna, ale toje, što ŭ dadzienaj situacyi ni dzicia, ni sabaka kantralavać svaje dziejańni nie mahli, sumnievu nie padlahaje. Sabaka pryniaŭ małoha za kankurenta na łasy kavałak z haspadarskaha stała, — ličyć Ihar Cichamiraŭ.
