Jak paviedamlaje amierykanski telekanał ABC sa spasyłkaj na svaje krynicy, pa adnoj ź viersij jad, jakim byli atručanyja Skrypal i jaho dačka Julija, moh być u paraškapadobnym stanie apynucca ŭ vientylacyjnaj sistemie aŭtamabila BMW, na jakim jeździŭ były pałkoŭnik HRU.
Raniej pravaachoŭnyja orhany Vialikabrytanii źviarnulisia pa dapamohu da žycharoŭ Sołśbiery, raźličvajučy vyśvietlić, dzie mienavita jeździŭ jaho aŭtamabil. 4 sakavika była apublikavanaja i fatahrafija aŭtamabila — bardovaha BMW 320D z rehistracyjnym numaram HD09 WAO.
Troje supracoŭnikaŭ śpiecsłužbaŭ raspaviali ABC pra toje, što zaraz u ich jość dakładnaje razumieńnie, što za atruta vykarystoŭvałasia złačyncami. Pa ich słovach, havorka idzie pra paraškapadobny fosfataarhaničny niejrataksin. «Heta rečyva, jakoje isnuje z časoŭ «chałodnaj vajny», — zajaviŭ telekanału vysokapastaŭleny supracoŭnik śpiecsłužbaŭ. Pavodle jaho słoŭ, rasijskaje jaho pachodžańnie sumnievaŭ nie vyklikaje.
Krynica telekanała taksama raspaviała, što pa słovach śviedkaŭ, u restaranie, kudy Skrypal pryjšoŭ z dačkoj niezadoŭha da straty prytomnaści, jon nieadekvatna razmachvaŭ rukami i vielmi hučna pramaŭlaŭ. Tłumačeńniem moža być toje, što atruta pačała dziejničać na jaho arhanizm.
