U rasijskim vydańni «Svobodnaja priessa» vyjšaŭ materyjał «Baćka Łukašenka padymaje ŭkrainskuju bajavuju avijacyju», u jakim vajskovy ekśpiert Siarhiej Iščanka śćviardžaje, što adradžeńnie i adnaŭleńnie ŭkrainskaj avijacyi, jakoje adbyvajecca za apošnija hady, zdaryłasia ŭ pieršuju čarhu pry dapamozie aficyjnaha Minska.
Rasijski aŭtar piša, što Ukraina paśla pieramohi Revalucyi hodnaści imkliva adnaviła moc svaich vajskova-pavietranych sił.
Iščanka pryvodzić statystyku, zhodna ź jakoj pa pačatak 2014 hoda va Ukrainie zastavałasia ŭsiaho 19 bajazdolnych ciažkich źniščalnikaŭ Su-27 (jašče 36 byli na kansiervacyi). A voś na maj 2017 hoda bajazdolnych samalotaŭ hetaj madeli było ŭžo 36, i heta pry tym, što vajskova-techničnaje supracoŭnictva pamiž Rasijaj i Ukrainaj było spyniena, a sama Ukraina nie vyrablaje nieabchodnych dla ramontu detalej. Paviedamlajecca, što ŭ apošni raz detali dla samalotaŭ Su-27 prychodzili z Rasii va Ukrainu ŭ 2008 hodzie, tamu aŭtar robić vysnovu, što bieź biełaruskaj dapamohi tut nie abyšłosia.
«Nichto asabliva i nie chavaje, što mienavita byccam by sajuzny Rasii Minsk daŭno pieratvaryŭsia ŭ hałoŭny pieravałačny punkt dla pastaŭki ukrainskim vajskoŭcam usiaho nieabchodnaha im z Rasii. Nieabchodnaha, u pieršuju čarhu, dla praciahu ŭzbrojenaj baraćby za Danbas»,
— piša aŭtar.
Taksama Iščanka ŭzhadvaje słovy Łukašenki da Parašenki jašče ŭ 2014 hodzie:
— Piatro Alaksiejevič, treba budzie ad Biełarusi niešta — skažy, my tabie za sutki ŭsio zrobim, što ty paprosiš. Usio, što prezident Ukrainy ni prasiŭ, publična kažu, my zaŭsiody ŭsio rabili. I tak budzie nadalej.
Aŭtar śćviardžaje, što adnym z punktaŭ sudakranańnia Kijeva i Minska staŭ «Aršanski avijaramontny zavod», jaki na 57% naležyć ukrainskaj kampanii «Motor-Sič». Tam vyrablajecca viertalot Mi-8MSB, dzie z ukrainskaha tolki ruchavik — usie inšyja detali vyrablajucca ŭ Biełarusi z dapamohaj rasijskich kampanij.
«Zrazumieła ž: kali biełarusy madernizujuć i ramantujuć kazachstanskija ci indanezijskija źniščalniki, to biez supracoŭnictva z rasijskimi pradpryjemstvami im prosta nie abyścisia. Pastaŭki ad nas sajuźniku nieabchodnych zapčastak i abstalavańnia — što ž u hetym takoha? I sumiesnaja praca, viadoma, idzie. A što z vyrablenaha ŭ Rasii i kudy nasamreč staviać pradprymalnyja braty-biełarusy — chto ž z RF takoje pravieryć na terytoryi suvierennaj krainy?» — piša ekśpiert.
