Unačy na sajcie «Našaj Nivy» źjaviłasia zahadka pra dźvie paralelnyja staličnyja vulicy, adlehłaść pamiž jakimi składaje 10 mietraŭ.
Słušny adkaz daŭ karystalnik «Alaksiej».
Nasamreč heta vulicy Kalcova i Stefanii Staniuty.
Vulica Staniuty źleva, vulica Kalcova sprava. Miarkujučy pa karcie, adlehłaść pamiž imi varjirujecca pamiž 6 mietrami i 20 mietrami.
Dadatkovaja asablivaść hetych vulic u tym, što ni pa adnoj ź ich zvyčajny čałaviek prajści nie moža. Jany pierakrytyja varotami, za jakimi znachodziacca šłahbaum i kantrolna-prapuskny punkt. A pamiž samimi vulicami staić ściana, jakaja adździalaje dva elitnyja katedžnyja pasiołki.
Pasiołak źleva adnosicca da vulicy Stefanii Staniuty. Daroha da jaje schavanaja na karcie lesam. Pasiołak sprava adnosicca da vulicy Kalcova. Spadarožnikavaja karta Jandeksa.
Vulica Stefanii Staniuty paznačana «pavierch» lesa. Vulica Kalcova źvierchu ad jaje. Spadarožnikavaja karta Huhła.
Vulica Kalcova — daŭniaje miesca pražyvańnie biełaruskich biznesmienaŭ. Tut, pobač ź Cnianskim vadaschoviščam, znachodziacca 20 elitnych katedžaŭ dla «svaich». Admietna, što nivodzin z damoŭ nie vystaŭleny na prodaž.
Dva hady tamu Minharvykankam vydzieliŭ susiedni ŭčastak sierbskamu zabudoŭščyku «Dana Astra». Heta kampanija bratoŭ Karyčaŭ, miljanieraŭ časoŭ kiravańnia Słabadana Miłošaviča.
Sierby pabudavali 14 katedžaŭ, jakija ŭ svabodny prodaž nie pastupali. Padjezd da ich atrymaŭ nazvu «vulica Stefanii Staniuty». Chto budzie žyć u hetych elitnych katedžach — pakul nieviadoma.
