Mikoła Statkievič raspavioŭ belsat.eu pra svaje palityčnyja płany na bližejšy čas. Pieradusim, jon akcentuje ŭvahu na supraćdziejańni refierendumu, jaki, imavierna, rychtujuć ułady.
Siem zajaŭnikaŭ ad siami arhanizacyjaŭ, siarod jakich Partyja BNF, Ruch «Za svabodu» i inšyja, na minułym tydni źviarnulisia ŭ Mienharvykankam z prośbaj dazvolić mitynh i šeście na 26 krasavika. U hety dzień biełaruskaja apazicyja tradycyjna pravodzić Čarnobylski šlach. Adkazu haradskich uładaŭ pakul niama.
«Užo hadoŭ dziesiać nichto nie dazvalaje sabracca ludziam la Akademii navuk, maksimum — zbor la kinateatru «Kastryčnik». Pad leśvicaj jany buduć niešta bałbatać, a źvierchu za imi buduć sačyć milicyjanty. Pahadžacca na takija ŭmovy — značyć, nie vielmi siabie pavažać. Ale davajcie dačakajemsia adkazu Mienharvykankamu, a potym budziem kamientavać farmat», — adkazaŭ Statkievič.
Pavodle jaho słovaŭ, hałoŭnaj palityčnaj padziejaj, ad jakoj varta adšturchoŭvacca, źjaŭlajecca refierendum.
«My budziem supraćdziejničać niezakonnamu refierendumu. Kali da 26 krasavika stanie viadomaja data i vyniesienyja na hałasavańnie pytańni, my skarystajemsia dla pratestu ŭ tym liku Čarnobylskim šlacham», — havoryć jon.
Statkievič nie admaŭlajecca i ad praviadzieńnia 1 traŭnia akcyi suprać refierendumu, ale padrabiaznaści pakul nie raskryvaje.
«Adzinaje, čaho baicca ŭłada, adziny srodak suprać jaje, jaki maje hramadstva — heta masavy pratest. Jon nie tolki padryvaje samu ŭładu, ale i razburaje jaje kanstrukcyi pra libieralizacyju, padrychtavanyja dla Zachadu. Kali na refierendumie pastaviać pytańnie ab padaŭžeńni prezidenckaha terminu, to 7 hadoŭ mohuć pačać ličyć ad momantu refierendumu. Značyć, nastupnyja vybary adbuducca tolki ŭ 2025 hodzie», — miarkuje palityk.
U intervju belsat.eu Statkievič pieraličyŭ «hałoŭnyja prykmiety taho, što rychtujecca refierendum».
«Pa-pieršaje, idzie štučny razahreŭ ekanomiki šlacham ulivańnia hrošaj u niekatoryja pradpryjemstvy. Pa-druhoje, dyskredytacyja pratestu rukami pierson, jakija vystupajuć za palapšeńnie režymu. Jany ž i praviali maštabnuju akcyju pa dyskredytacyi pratestavaha šeścia 25 sakavika. Ułada taksama pravieryła ŚMI na łajalnaść, asabliva tyja, jakija pracujuć u biełaruskim siehmiencie internetu. Začystka infarmacyjnaha pola atrymałasia. Ja maju na ŭvazie vypadki, kali niedziaržaŭnyja ŚMI pieradavali abraźlivyja vykazvańni hetych piersonaŭ na adras prychilnikaŭ šeścia», — kaža Statkievič.
