U Rasii paeta Alaksandra Byŭšava prysudzili da 330 hadzin abaviazkovych prac za publikacyju na asabistaj staroncy Ukantakcie vierša «Na niezaležnaść Ukrainy», paviedamlajuć «Hrani».
U jakaści dadatkovaha pakarańnia na asudžanaha, nastaŭnika niamieckaj movy pa prafiesii, nakładziena trochhadovaja zabarona pracavać u škole.
45-hadovy Byŭšaŭ, žychar miastečka Kromy, abvieščany vinavatym pa častcy 1 artykuła 282 KK Rasii (raspalvańnie nianaviści albo varožaści).
U prysudzie zajaŭlajecca, što Byŭšaŭ padtrymlivaje «režym, jaki skłaŭsia na Ukrainie paśla dziaržaŭnaha pieravarotu 2014 hoda». Byli zacytavanyja pakazańni śviedak abvinavačvańnia. U ich siarod inšaha adznačałasia, što paet «zaŭsiody asudžaŭ palityku Rasiei ŭ dačynieńni da Abchazii».
«Byŭšaŭ admoŭna adklikajecca pra kiraŭnictva Rasii, sprabuje naviazać svajo mierkavańnie, — taksama havaryłasia ŭ śviedkavych pakazańniach. — U žyćci nie skłałasia — voś i vyrašyŭ pajści šlacham Iudy». Vučni ŭ škole, zajaŭlaŭ adzin sa śviedkaŭ, stavilisia da abvinavačanaha niehatyŭna i kryčali jamu śledam «Benderaviec!».
Adznačałasia, što «Byŭšaŭ vykazvaje svoj punkt hledžańnia, adrozny ad mierkavańnia pieravažnaj bolšaści nasielnictva Rasii», a taksama što «maci Byŭšava źjaŭlajecca ŭkrainkaj i, mahčyma, zaachvočvaje Byŭšava da niehatyŭnych vykazvańniaŭ pra Rasiju».
Sam paet vinu nie pryznaŭ. Jon nie admaŭlaŭ fakta publikacyi vierša, adnak nastojvaŭ, što maje prava na vykazvańnie mierkavańnia.
Vierš «Na niezaležnaść Ukrainy» — palemičny adkaz na adnajmiennuju antyodu Iosifa Brodskaha (1992), vytrymanuju ŭ duchu vialikaruskaha šavinizmu.
