U dvuch rehijonach Rasii 23 vieraśnia prachodziać druhija tury hubiernatarskich vybaraŭ. Kančatkova vyznačycca z tym, chto budzie ŭznačalvać ich rehijon, pavinny žychary Chabaraŭskaha kraja i Uładzimirskaj vobłaści.
U Chabaraŭskam krai ŭ druhi tur vybaraŭ vyjšli dziejučy kiraŭnik rehijona Viačasłaŭ Šport i kandydat ad ŁDPR Siarhiej Furhał. Padčas hałasavańnia 9 vieraśnia jany nabrali 35,62% i 35,81% adpaviedna.
Va Uładzimirskaj vobłaści praciŭnikam dziejučaha hubiernatara ad «Adzinaj Rasii» Śviatłany Arłovaj taksama staŭ kandydat ad ŁDPR — Uładzimir Sipiahin. U pieršym tury vybaraŭ Arłova nabrała 36,42% hałasoŭ suprać 31,36% u Sipiahina.
Paŭtornaje hałasavańnie taksama pavinna było prajści ŭ Chakasii. Adnak 21 vieraśnia ŭviečary dziejučy kiraŭnik rehijona z «Adzinaj Rasii» Viktar Zimin źniaŭ svaju kandydaturu. U druhim tury jon pavinien byŭ sustrecca z supiernikam ad kamunistaŭ Valancinam Kanavałavym. 9 vieraśnia Zimin, jaki nabraŭ 32,4% hałasoŭ, apynuŭsia na druhim miescy, sastupiŭšy Kanavałavu (44,81%).
U suviazi z admovaj Zimina ad udziełu ŭ hałasavańni vybarkam respubliki pieranios druhi tur na 7 kastryčnika. Supiernikam Kanavałava stanie kandydat, jaki zaniaŭ treciaje miesca.
Rašeńnie źniacca z vybaraŭ Zimin patłumačyŭ stanam zdaroŭja. U toj ža čas niekalki krynic RBK paviedamili, što pryčynaj staŭ zvanok z Kramla ŭ suviazi z adsutnaściu šancaŭ na pieramohu.
16 vieraśnia druhi tur hubiernatarskich vybaraŭ prajšoŭ u Prymorji. Padčas padliku da apošniaha momantu lidziravaŭ kandydat-kamunist. Adnak paśla apracoŭki 99% pratakołaŭ dziejučy kiraŭnik rehijona ad «Adzinaj Rasii» raptam vyrvaŭsia napierad.
