Dva japonskija minirobaty MINERVA-II1A i MINERVA-II1B paśpiachova pryziamlilisia na pavierchniu asteroida Ruhu. Abodva znachodziacca ŭ dobrym stanie i pieradajuć z asteroida fatahrafii i dadzienyja, paviedamlajecca na sajcie japonskaha ahienctva aerakaśmičnych daśledavańniaŭ (JAXA).
Robaty adździalilisia ad japonskaha kaśmičnaha zonda «Chajabusa-2» 21 vieraśnia. Sama mieniej adzin ź ich zaraz ruchajecca pa pavierchni asteroida, piša ahienctva.
Fota: JAXA.
MINERVA-II1 — heta pieršyja ŭ śviecie mabilnyja daśledčyja robaty, jakija vysadzilisia na pavierchniu asteroida. Kožny robat važyć usiaho adzin kiłahram. Hetyja robaty ŭpieršyniu zmahli aŭtanomna pieramiaščacca i rabić fatahrafii na pavierchni asteroida.
«Ja byŭ tak uzrušany tym, što hetyja maleńkija samachodnyja aparaty paśpiachova daśledujuć pavierchniu asteroida, tamu što my nie zmahli hetaha damahčysia 13 hadoŭ tamu. Mianie asabliva ŭrazili foty, zroblenyja ź blizkaj adlehłaści na pavierchni asteroida», — skazaŭ kiraŭnik misii prajekta «Chajabusa-2» Makota Jošykava.
Vyjavy atrymalisia krychu razmytymi. Akramia taho, na ich źjavilisia kalarovyja plamy z-za adlustravańnia soniečnaha śviatła.
Fota: JAXA.
«Choć ja i byŭ rasčaravany razmytym malunkam, ale tut važna toje, što jon byŭ zrobleny samachodnym aparatam. Bolš za toje, fatahrafija, zroblenaja ŭ momant skačka robata na pavierchniu asteroida, paćvierdziła efiektyŭnaść takoha miechanizma ruchu», — skazaŭ adkazny za prajekt MINERVA-II1 Tecua Jošymicu.
U čym zaklučajecca misija «Chajabusa-2»?
Misija «Chajabusa-2» pačałasia ŭ 2014 hodzie. Jaje košt składaje $150 miljonaŭ. Kaśmičny zond «Chajabusa-2» lacieŭ da asteroid Ruhu try z pałovaj hady i dabraŭsia da jaho ŭ kancy červienia.
Zadačy zonda — vyvučyć asteroid i dastavić na Ziamlu ŭzory parod, ź jakich jon składajecca. «Pierš za ŭsio, my vielmi ŭvažliva vyvučym reljef pavierchni. Zatym abiarem miesca pasadki. Mienavita tam buduć sabranyja proby parod», — raspaviadaŭ kiraŭnik prajekta Jošykava.
Dyjamietr asteroida Ruhu składaje kala 900 mietraŭ, jon ździajśniaje poŭny abarot vakoł svajoj vosi za siem z pałovaj hadzin. Jon znachodzicca za 290 miljonaŭ kiłamietraŭ ad Ziamli. «Chajabusa-2» praviadzie na arbicie vakoł Ruhu kala 1,5 hoda.
Ruhu naležyć da asteroidaŭ kłasa Z, jakija ličacca adnosna prymityŭnymi. Heta značyć, što na jaho pavierchni mohuć znajści arhaničnyja materyjały i hidraty. Vyvučeńnie chimičnaha sastavu Ruhu moža dapamahčy navukoŭcam zrazumieć rannija etapy evalucyi Soniečnaj sistemy.
