Na biełaruska-rasijskich pieramovach u Sočy 21 vieraśnia abmiarkoŭvałasia pytańnie ab pradaŭžeńni terminu viartańnia kredytu na budaŭnictva Biełaruskaj AES i źnižeńnia pracentnaj staŭki. Pra heta na naradzie ŭ Minsku 22 vieraśnia zajaviŭ Alaksandr Łukašenka, pieradaje BiełTA.
Alaksandr Łukašenka rastłumačyŭ, što biełaruski bok heta matyvuje tym, što terminy pa budaŭnictvie rasijskim bokam parušany.
«Pakul adkładajecca zapusk pieršaha błoka až na hod. Bajusia, jak mianie infarmujuć kantralory, što, moža być, Rasija paprosić jašče bolš ssunuć hety termin, što ŭžo naohuł niedapuščalna. I kali terminy byli sarvanyja (my, viadoma, nie chočam iści ŭ sudy, sudzicca, jak heta pa damovie), my damovilisia ab tym, što termin viartańnia kredytu treba pradoŭžyć», — adznačyŭ Łukašenka.
«Heta prykładna da 3%. Admovy nijakaj. Treba prosta dapracavać hetaje pytańnie. I ja dumaju, što my možam vyrašyć hetaje pytańnie ŭ tym klučy, u jakim ja skazaŭ», — dadaŭ biełaruski lidar.
Adnak u Rasii zajavu Łukašenki abvierhli. Staršy vice-prezident pa budaŭnictvu Biełaruskaj AES AT «Inžynirynhavaja kampanija «ASE» (uvachodzić u «Rosatam») Siarhiej Ołancaŭ zajaviŭ, što budaŭnictva Biełaruskaj AES z udziełam Rasii idzie pa hrafiku, paviedamlaje RIA «Novosti».
«Ahułam pracy na pieršym i druhim enierhabłoku iduć pa hrafiku», — skazaŭ Ołancaŭ.
