Za kampanijaj Airiston Helmi, pa jakoj, pa dadzienych ŚMI, u Finlandyi viadziecca maštabnaje rasśledavańnie, staić rasijski biznesmien, imavierna, źviazany z FSB. Padazrajuć, što jaho firma rychtavała ŭčastak u Finlandyi dla ramontu rasijskich padvodnych łodak. Pra heta paviedamlaje finskaje vydańnie Yle.
U hetyja vychadnyja niedaloka ad horada Turku prajšła vialikaja śpiecapieracyja finskaj palicyi ŭ supracoŭnictvie ź inšymi dziaržaŭnymi strukturami. Rasśledavańnie tyčycca admyvańnia hrošaj u mižnarodnych maštabach. Palicyja nie raskryvaje, jakaja firma i chto znachodzicca pad padazreńniem. Adnak šmatlikija finskija ŚMI paviedamlajuć: havorka idzie ab kampanii Airiston Helmi, jakaja nieadnarazova fihuravała ŭ zahałoŭkach ŚMI.
Airiston Helmi zasnavana vosieńniu 2007 hoda, tady staršynioj praŭleńnia kampanii byŭ zarehistravany mužčyna rasijskaha pachodžańnia 1964 hoda naradžeńnia. Pa dadzienych finskaha rejestra kamiercyjnych kampanij, u jaho jość hramadzianstva Malty.
Žurnalisty Yle MOT vyśvietlili, što ślady ŭładalnikaŭ firmy i členaŭ jaho praŭleńnia viaduć taksama ŭ Polšču, Estoniju i Italiju. ŚMI źviartali ŭvahu na padazronyja apieracyi kampanii ź ziamielnymi ŭčastkami na stratehična važnych terytoryjach. Adnojčy žurnalisty zdymali z drona ŭčastak, jaki naležyć firmie, adnak bieśpiłotnik pry niezrazumiełych abstavinach upaŭ. Kali žurnalisty znajšli kvadrakoptar, prymacavanaja da jaho kamiera źnikła.
Z 2007 pa 2014 hady Airiston Helmi zaklučyła ŭ rajonie archipiełaha Turku mnostva ździełak ź ziamielnymi ŭčastkami na ahulnuju sumu prykładna 9,2 młn jeŭra. U asnoŭnym kampanija skuplali ziemli, adnak u 2014 hodzie pradała pryvatnaj asobie vialiki ŭčastak u Parajnien za 4,5 miljona jeŭra. U rejestry nieruchomaści nie paznačana, chto staŭ novym uładalnikam ŭčastka.
Charakterna, što kampanija štohod pracuje biesprybytkova: u 2017 hodzie straty skłali 300 tysiač jeŭra.
Asnoŭnyja aściarohi finaŭ pa Airiston Helmi źviazany z tym, što firma skuplaje ziamielnyja ŭčastki kala miescaŭ, važnych z punktu hledžańnia nacyjanalnaj biaśpieki.
U niadzielu były deputat centrysckaj partyi Mika Kiarnia zajaviŭ, što rasśledavańnie ekanamičnych złačynstvaŭ pa Airiston Helmi źjaŭlajecca sapraŭdnym, ale adnačasova słužyć prykryćciom inšaj spravy. Palityk śćviardžaje, što kampanija rychtavała ŭčastak pad vajennuju havań dla raźmiaščeńnia i ramontu rasijskich padvodnych łodak u Bałtyjskim mory, a kiraŭnik kampanii źviazany z FSB.
U Centralnaj kryminalnaj palicyi Finlandyi nastojvajuć: rasśledavańnie tyčycca vyklučna ekanamičnych złačynstvaŭ, u vyniku jakich byli admyty vialikija sumy hrošaj.
