«Naša Niva» tradycyjna sočyć za publikacyjami ŭ rasijskich ŚMI na temu biełaruska-rasijskich adnosin. My zaŭsiody staralisia pierakazvać našym čytačam samyja cikavyja i hruntoŭnyja publikacyi na hetuju temu z rasijskich miedyja.
Fota: kremlin.ru.
Adsočvańnie infarmacyjnaj prastory Rasii — važnaja zadača dla biełaruskich žurnalistaŭ. Rasijska-ŭkrainski kanflikt pakazaŭ, što rasijskija ŚMI ŭ luby momant mohuć pieratvarycca ŭ instrumient prapahandy, kali jany pačynajuć atakavać nie tolki ŭładu susiednich krain, ale i sami susiednija dziaržavy, staviačy pad sumnieŭ ich niezaležnaść i suvierenitet. Dla taho, kab rasijskija ŚMI nie raźviazali suprać Biełarusi takuju ž ataku, jak suprać Ukrainy, my i zajmajemsia ich manitorynham.
Pierad sustrečaj Łukašenki i Pucina ŭ kancy žniŭnia ŭ Sočy kolkaść krytyčnych u adnosinach da Biełarusi i biełaruskaha kiraŭnictva publikacyj była vysokaj, jak siarod marhinalnych ŚMI (kštałtu Regnum abo IA Rex), tak i siarod bujnych papularnych vydańniaŭ (kštałtu Lenta.ru, Life i «Kommiersant» ).
Adnak adrazu paśla hetaj sustrečy kolkaść publikacyj u rasijskich ŚMI na biełaruskuju tematyku rezka źniziłasia. Tradycyjna nieabyjakavymi da biełaruskaj tematyki zastajucca Regnum i inšyja marhinalnyja sajty, adnak ahulnaja kolkaść publikacyj i ich krytyčny składnik istotna skaracilisia.
Kali razhladać vypady rasijskich ŚMI suprać Biełarusi jak formu cisku na biełaruskaje kiraŭnictva, možna zrabić adnaznačnuju vysnovu: Pucin i Łukašenka damovilisia.
