«Vova nie byŭ lichim kiroŭcam, naadvarot — vielmi aściarožnymi», — kažuć žychary Pietrykava, jakija viedajuć kiroŭca VW Transporter, jaki ŭčora trapiŭ u śmiarotnuju avaryju ŭ Kalinkavickim rajonie. Kiroŭca da hetaha času znachodzicca ŭ špitali ŭ vielmi ciažkim stanie, a ŭ Pietrykavie rychtujucca da pachavańniaŭ zahinułych u avaryi žančyn. Piša TUT.BY.
Fota: Śledčy kamitet
Nahadajem, avaryja adbyłasia 14 listapada kala 10.55 na 176-m km trasy M10 «Miaža RF — Homiel — Kobryn». Mikraaŭtobus VW Transporter pad kiravańniem 30-hadovaha kiroŭcy vyjechaŭ na pałasu sustrečnaha ruchu, dzie sutyknuŭsia z małakavozam, za styrnom jakoha byŭ 29-hadovy žychar Kalinkavičaŭ.
U vyniku DTZ piać žančyn va ŭzroście 47, 43, 41, 40, 25 hadoŭ, jakija jechali ŭ VW Transporter, pamierli na miescy zdareńnia. Usie zahinułyja pražyvali ŭ Pietrykavie. Kiroŭca VW Transporter špitalizavany ŭ reanimacyjnaje adździaleńnie.
— Usie my ŭ šoku, nie možam ačuniać ad taho, što adbyłosia. Strašna… — kaža adna z žycharak Pietrykava. — U avaryi zahinuła maja siabroŭka, Karyna, joj było ŭsiaho 25 hadoŭ. Troje dzietak zastałosia: šeść, piać i dva hady.
Dziaŭčyna raskazała AUTO.TUT.BY, što kiroŭca Uładzimir i Karyna žyli razam, usiudy jeździli razam, voś i ŭčora pajechali ŭ Kalinkavičy.
— U Vovy byŭ svoj mikraaŭtobus i advieźci ŭ Kalinkavičy na rynak i nazad jaho paprasili čatyry našyja ziamlački, na paliva, napeŭna, skinulisia. Karyna pajechała ź imi, moža, na rynku chacieła niešta kupić… U ich vielmi dobraja siamja — družnyja, pracavityja, zajmajucca narychtoŭkaj jahad — ciažkaja praca.
Fota: Śledčy kamitet
Tyja, chto viedaŭ Uładzimira, ździŭlajucca: jak takaja žudasnaja avaryja mahła ź im adbycca? Aŭtamabilist jon byŭ vielmi akuratny i aściarožny: sačyŭ za svaim aŭto, jeździŭ vielmi aściarožna, chutkaść nie pieravyšaŭ i chvackija manieŭry na darozie nie dapuskaŭ.
— Daroha ŭ toj dzień była drennaja, a ŭ jaho na mikraaŭtobusie stajała letniaja huma. Napeŭna, aŭto zaniesła i jano vyskačyła na sustrečnuju. Nu nie moh jon sam tudy vyjazdžać! — miarkujuć ludzi.
U avaryi, akramia Karyny, zahinuli Rada, Luba, Anžeła i Vita. Va ŭsich žančyn zastalisia dzieci. Kiroŭca da hetaha času zastajecca ŭ reanimacyi, jaho stan aceńvajecca jak vielmi ciažki
— Dla nas samaje strašnaje napieradzie — pachavańnie… Z Karynaj raźvitajemsia ŭ piatnicu. Astatnich žančyn pachavajuć taksama na hetym tydni.