Žančyna sprabavała pierasiekčy miažu ź Litvoj pa pašparcie zvodnaj siastry, kab zatym patrapić u Aŭstryju. Pra heta paviedamlaje Dziaržpahrankamitet.
Zdareńnie adbyłosia kala hadziny nočy ŭ punkcie propusku «Bieniakoni» pry afarmleńni lehkavika «Opiel», pahraničny narad vyjaviŭ parušalnika.
Padčas pravierki dakumientaŭ adna z pasažyrak pradjaviła pašpart hramadzianki Rasii. Adnak było ŭstanoŭlena, što dakumient nie naležyć pradjaŭniku. Zatrymanaja pryznałasia, što ŭziała pašpart zvodnaj siastry, jakaja maje prava na pastajannaje pražyvańnie ŭ Vienie. Mienavita ŭ stalicu Aŭstryi i nakiroŭvałasia pravaparušalnica, žadajučy zastacca ŭ Jeŭrasajuzie na pastajannaje miesca žycharstva.
U dačynieńni da zatrymanaj raspačaty administracyjny praces za niezakonnaje pierasiačeńnie miažy. Jana źmieščana ŭ izalatar časovaha ŭtrymańnia.
