Fota Dźmitryja Bruško
Maryna Zołatava nie pryznaje siabie vinavataj pa č. 2 art. 425 KK (Biaździejnaść słužbovaj asoby). Jana nikoli nie karystałasia płatnaj padpiskaj BiełTA, a škodu žurnalistam Tut.by vystaŭlali jak fizičnym asobam. Adzin zachod śledstva pryraŭniała da koštu padpiski za miesiac dla jurydyčnych asob.
Učora sud pryniaŭ zajaŭlenuju admovu ad iskavych patrabavańniaŭ «SB» da Maryny Zołatavaj, raniej vydaviecki dom vystaviŭ sumu ŭ 18 172 rubloŭ, vosieńniu 2018 hoda jaje pahasili žurnalisty Tut.by, u dačynieńni da jakich kryminalny pieraśled byŭ spynieny. Tamu pradstaŭnik «SB» Alaksiej Špileŭski bolš nie ŭdzielničaje ŭ pracesie.
U sudzie ŭžo dapytanyja ŭsie śviedki, vyvučanyja 58 tamoŭ kryminalnaj spravy i siońnia, 19 lutaha, sud Zavodskaha rajona Minska pierajšoŭ da dopytu abvinavačvanaj — hałoŭnaha redaktara Tut.by Maryny Zołatavaj.
Prakuror prapanavaŭ vykazacca Marynie Zołatavaj pa sutnaści pradjaŭlenaha abvinavačańnia.
«Pra najaŭnaść niesankcyjanavanaha dostupu da płatnaj padpiski BiełTA ja daviedałasia ŭ sakaviku 2018 hoda. Heta pytańnie abmiarkoŭvałasia ŭ telefonnaj razmovie z Hannaj Kałtyhinaj (redaktaram Tut.by). Kali mnie stała viadoma, što ŭ jaje jość dostup, ja skazała: «Heta drenna. Budziem raźbiracca», — raspaviadaje Zołatava.
Na nastupny dzień Hanna Kałtyhina paraŭnała pieravahi płatnaj padpiski i adkrytaha dostupu.
— Vyśvietliłasia, što roźnica pa časie (u vystaŭleńni navinaŭ) adsutničaje abo nievialikaja. My pryjšli da vysnovy, što płatnaja padpiska niemetazhodnaja. Ania skazała, što dostupam bolš karystacca nie budzie, bolš my da hetaha pytańnia nie viartalisia. Škaduju, što nie pryniała bolš rašučych mier. Ab hetym škaduju ciapier i kajusia, — zajaviła Maryna Zołatava
«Ja mahła zdahadvacca [pra niesankcyjanavany dostup], kali b naohuł pra heta dumała. U mianie nie było padstaŭ uzdymać pytańnie «a ci niama ŭ nas niesankcyjanavanaha dostupu da BiełTA?» Pra heta nie kazali ŭ redakcyi, u mianie nichto nie pytaŭsia parol».
Dziaržabvinavaŭca Julija Charčejkina padrabiazna pytajecca pra strukturu redakcyi, chto i kamu padparadkoŭvajecca, chto prymaje rašeńnie ab publikacyi tekstu i ci patrabujecca dla hetaha dazvoł Zołatavaj.
— Nie mahu pračytać 200 materyjałaŭ u sutki, — tłumačyć redaktar i kaža, što redaktary adździełaŭ samastojna prymajuć rašeńni.
— Jakija płatnyja padpiski jość u redakcyi Tut.by? — zadaje čarhovaje pytańnie prakuror.
— Na BiełaPAN, TASS, Reuters, ź Bi-bi-si jość pahadnieńnie inšaha charaktaru. Jašče z šeraham vydańniaŭ — vusnyja damoŭlenaści, partniorskija, — udakładniaje Zołatava.
Pa słovach abvinavačvanaj, kaliści jana sama inicyjavała pytańnie ab zaklučeńni dahavora ź BiełTA.
— Ja sama telefanavała ŭ redakcyju BiełTA, cikaviłasia płatnaj padpiskaj. Moj surazmoŭca i supracoŭnik ahienctva pacikaviŭsia, dla čaho, ździviŭsia i skazaŭ: «Dla vas heta budzie niemahčyma abo doraha», — uspaminaje Maryna Zołatava.
— Nie paźniej za 2010 hod my damovilisia z kiraŭnictvam BiełTA ab vykarystańni troch spasyłak (pry publikacyi naviny BiełTA na Tut.by). Možna było vykarystać usio z adkrytaha dostupu. Takoje supracoŭnictva BiełTA było vyhadna, pierachody z Tut.by ŭpłyvali na ich trafik. Pra heta mnie raspaviadaŭ i supracoŭnik ahienctva, — kaža Maryna Zołatava.
Jana nie viedała dakładna, ale «mahła zdahadvacca», što inšyja supracoŭniki Tut.by karystajucca płatnaj padpiskaj.
- Heta tema abmiarkoŭvałasia ŭ žurnalisckim asiarodku, što paroli BiełTA hulajuć (siarod biełaruskich ŚMI). (…) Čuła, u 2016 hodzie pa hetaj nahodzie na BiełTA adbyłasia narada, - adznačaje Maryna Zołatava.
— Ci ŭpłyvaje čas publikacyi na rejtynh? - cikavicca dziaržabvinavaŭca.
— Heta ŭpłyvaje na samaacenku samoha aŭtara i vydańnia. Što tyčycca rejtynhu, my paprasili śpiecyjalista zrabić zaklučeńnie na hety kont, jano ciapier rychtujecca. Čas publikacyi — adzin sa šmatlikich faktaraŭ, jaki moža paŭpłyvać na rejtynh, — vykazvaje svajo mierkavańnie Zołatava.
— Rejtynh ŭpłyvaje na rekłamu i dachod pradpryjemstva? — znoŭ pytajecca dziaržabvinavaŭca.
— Sačyć za hetymi suviaziami nie maja kampietencyja.
Hałoŭny redaktar nie bačyć suviazi pamiž vykarystańniem navin ahienctva i rejtynham Tut.by.
— Tut.by znachodzicca na pieršym miescy, niahledziačy na toje, što źviali vykarystańnie materyjałaŭ BiełTA da minimumu, — kaža Maryna Zołatava.
Redaktar Tut.by admaŭlaje pakazańni ŭ sudzie byłoha dyrektara ahienctva BiełTA Dźmitryja Žuka, jaki śćviardžaŭ: jon prapanoŭvaŭ Zołatavaj aformić płatnuju padpisku, ale jana admoviłasia.
— Dźmitryj Žuk sam tłumačyŭ, što jany nie zajmalisia kamiercyjnaj dziejnaściu, usie padpisčyki prychodzili sami, — kamientuje hety momant Zołatava.
Hałoŭny redaktar Tut.by pryvodzić ličby: za toj termin, pra jaki idzie havorka na pracesie, BiełTA atrymała z Tut.by 350 tysiač pierachodaŭ.
- U adzin ź dzion pierachody z našaha sajta skłali pałovu trafiku BIEŁTA, - udakładniaje abvinavačanaja.
Pa słovach Maryny Zołatavaj, materyjały ŭ peŭny pieryjad ahienctva składali 4% ad usich publikacyj na Tut.by ( heta byli materyjały z adkrytaha dostupu, a nie z padpiski).
Sud paprasiŭ Marynu Zołatavu vykazać svajo staŭleńnie da abvinavačańnia.
- Vialikaj škodaj dla reputacyi BiełTA źjaŭlajecca sam praces, pakolki tut zakranajecca pytańnie ab zachavanaści infarmacyi ahienctva. Kiraŭnictva BiełTA viedała ab vykarystańni parolaŭ inšymi žurnalistami, a adkazvać za heta pavinna Zołatava i hetaja situacyja mnie zdajecca dziŭnaj, — vykazvaje svaju pazicyju Maryna Zołatava.
