Pa słovach Škuratava, staličnyja transpartniki majuć namier unieści prapanovy ab zakupcy ŭ nastupnym hodzie nie mienš za 100 bieskantaktavych tralejbusaŭ i kala 200 aŭtobusaŭ. Bolš dakładnyja raźliki buduć viadomyja bližej da leta.
Adkazvajučy na pytańnie minčanki pra pierśpiektyvy budaŭnictva tralejbusnaj sietki ŭ Kamiennaj Horcy, Škurataŭ zaŭvažyŭ:
— Z dapamohaj tralejbusaŭ na aŭtanomnym chodzie my zmahli b zakryć hetuju šmathadovuju prablemu, pakolki kantaktnaja sietka ŭ bližejšyja hady ŭ vašym žyłym rajonie naŭrad ci źjavicca, jak i ŭ rajonie vulicy Łabanka. Na 2019 h. zapłanavana tolki rekanstrukcyja kantaktnaj sietki na pierakryžavańni vulicy Alšeŭskaha i praśpiekta Puškina.
Jość vierahodnaść, što častka tralejbusaŭ na aŭtanomnym chodzie, kali jany pastupiać u nastupnym hodzie, buduć nakiravanyja taksama ŭ Łošycu na vulicu Ptašuka.
— Pakul na joj usiaho niekalki damoŭ, jakija znachodziacca ŭ miežach piešachodnaj dastupnaści ad prypynkaŭ, transpartnyja znosiny mianiać nie budziem, — skazaŭ jon. — Ale ŭ nastupnym hodzie, kali mikrarajon zabudujuć, my nie vyklučajem mahčymaści vykarystańnia tam elektratranspartu, u pryvatnaści bieskantaktavych tralejbusaŭ. Jany dobryja tym, što častku šlachu iduć jak zvyčajnyja tralejbusy, zatym — na aŭtanomnym chodzie. Batareja zaradžajecca pa chodzie ruchu tralejbusa, tak što dadatkovych padstancyj nie patrabujecca.
