Na hetym tydni Minsk z aficyjnym vizitam naviedaŭ namieśnik pamočnika Dziaržsakratara ZŠA Džordž Kient. Tut jon sustreŭsia z kiraŭnikom MZS, namieśnikam kiraŭnika MUS, niezaležnymi ŚMI, pradstaŭnikami apazicyi, hramadzianskaj supolnaści, uskłaŭ kvietki da pomnikaŭ achviaram Chałakosta i zasnavalnikam BNR. Pradstaŭnik Dziarždepa ZŠA adkazaŭ na niekalki pytańniaŭ Tut.by pra budučyniu biełaruska-amierykanskich adnosin.
Pavieranaja ŭ spravach ZŠA ŭ Biełarusi Dženifier Mur i Džordž Kient u Minsku. Fota: Pasolstva ZŠA ŭ Miensku.
— Ja pryjechaŭ u Minsk, kab jašče raz zajavić pra našu padtrymku suvierenitetu i niezaležnaści Biełarusi i paćvierdzić naša imknieńnie da kanstruktyŭnych adnosin z narodam i ŭładami Biełarusi, — adznačaje Džordž Kient.
Pradstaŭnik Dziarždepa adznačaje, što vizit u Biełaruś pamočnika dziaržsakratara Mitčeła ŭ listapadzie minułaha hoda — pieršy nastolki vysokaha ŭzroŭniu za apošnija dziesiać hadoŭ — prajšoŭ vielmi paśpiachova.
Siońnia Vašynhton zadavoleny prahresam, dasiahnutym u dvuchbakovych adnosinach za apošnija niekalki miesiacaŭ, u tym liku — pašyreńniem prysutnaści pasolstva ZŠA, kolkaść supracoŭnikaŭ jakoha z 2008 hoda zastavałasia niedastatkovaj.
Praŭda, nazvać kankretnyja terminy, kali ŭ Minsk pryjedzie amierykanski pasoł, pradstaŭnik Dziarždepa nie moža.
Pradstaŭnik Dziarždepa adznačaje: ZŠA padtrymlivajuć niezaležnaść i suvierenitet Biełarusi, ceniać układ Biełarusi ŭ rehijanalnuju biaśpieku i raźličvajuć na pašyreńnie supracoŭnictva ŭ tych halinach, dzie intaresy krain supadajuć, takich jak achova miežaŭ i ekanamičnaje raźvićcio. Istotnymi ž elemientami adnosin ź Biełaruśsiu ŭ ZŠA ličać pravy čałavieka i demakratyju.
— My častkova prypynili dziejańnie sankcyj paśla taho, jak biełaruskija ŭłady vypuścili na svabodu šaściarych palitviaźniaŭ u žniŭni 2015 hoda. U kastryčniku minułaha hoda ZŠA praciahnuli režym časovaha prypynieńnia sankcyj u dačynieńni da dzieviaci biełaruskich kampanij nie na šeść miesiacaŭ, jak rabiłasia raniej, a na dvanaccać, — kaža Džordž Kient.
Pry pryniaćci rašeńnia ab pavieličeńni hetaha pieryjadu, tłumačyć dypłamat, urad ZŠA ŭličvaŭ mnohija faktary, u tym liku pazityŭny padychod biełaruskich uładaŭ da svabody schodaŭ na praciahu minułaha hoda, jaki byŭ prademanstravany pry praviadzieńni śviatočnych mierapryjemstvaŭ 25 sakavika z nahody stahodździa Biełaruskaj Narodnaj Respubliki.
— Dazvoł na praviadzieńnie padobnaha mierapryjemstva 25 sakavika hetaha hoda budzie rascenieny jak čarhovy krok napierad, — adznačaje pradstaŭnik Dziarždepa ZŠA.
Niadaŭna eks-hienieralny sakratar NATA Anders Foh Rasmusen zajaviŭ, što Rasija płanuje anieksavać Biełaruś i nablizicca da miežaŭ Zachodniaj Jeŭropy. Ci bačyć Vašynhton pahrozu dla Biełarusi z Rasii?
— Jak padkreśliŭ były pamočnik dziaržsakratara ZŠA Ues Mitčeł padčas svajho vizitu ŭ Minsk, Złučanyja Štaty nie prosiać Biełaruś rabić vybar pamiž Rasijaj i Zachadam. Padtrymka niezaležnaści i suvierenitetu Biełarusi i ŭsich inšych postsavieckich krain źjaŭlajecca daŭniaj palitykaj Złučanych Štataŭ. My ličym, što Biełaruś pavinna być volnaja ŭ vybary svajho losu i kirunkaŭ raźvićcia. Heta ž tyčycca i jaje adnosin z susiedziami, — kaža Džordž Kient.
